Здружението на јавните обвинители изразува поддршка кон обвинителка од Кичево, чиј автомобил завчера изгоре откако во гаражата од нејзината семејна куќа била фрлена експлозивна направа која предизвикала пожар. Здружението бара институциите да ја заштитат обвинителката и да се најде сторителот.
„Овој чин, освен загрозување на личната сигурност на јавниот обвинител и членовите на неговото семејство, претставува сериозна закана и атак врз целата институција и принципот на владеење на правото во нашата држава. Ваквиот чин, не само што нема да го поколеба јавниот обвинител во извршувањето на својата функција туку претставува поттик на целата институција за уште подоследно извршување во својата функција и примена на принципот на легалитет на гонење на сторителите на кривични дела. Изразуваме силна поддршка за нашата колешка да истрае во борбата против криминалитетот. Истовремено, ги повикуваме надлежните органи во чија надлежност е оперативата за откривање на сторителите на кривични дела, да преземат соодветни мерки за брзо откривање на сторителот на овој насилнички акт“,
реагираат од Здружението.
Инаку, ова не е прв напад кон обвинителката. Пред повеќе од еден месец со нож биле исечени гумите на истото возило. Засега нема информации кој е сторителот и дали ваквите два напада се поврзани.
По предизвиканиот пожар, екипа од МВР направила увид и издадени се наредби за подигање примероци од експлозивната материја за да се вештачат.
Обвинителството врши проверка и на видеозаписите од камери поставени на околните објекти.