Пратка од 38 400 дози од вакцината на „Астра Зенека“ вчера пристигнаа на меѓународниот аеродорм во Тирана како дел од ковакс-механизмот за распределба на вакцини против ковид-19.
Премиерот Еди Рама, кој на аеродромот беше заедно министерката за здравство Огерта Манастирлиу и министерот за обнова Арбен Ахметај, најави нова пратка од 60 илјади вакцини и соопшти дека во северниот албански град Кукс ќе бидат вакцинрани здравствените работници од Косово.
„Вакцинацијата за просветните работници започнува утре. Уште 60 000 дози ќе пристигнат во април. Идејата е да се направи интензивна вакцинација. Подготвени сме, од утре, да организираме, заедно со Косово, да им дадеме можност на лекарите и медицинските сестри од ковид-болниците, почнувајќи од болницата во Приштина. Ги чекаме братски во Кукс, каде ќе ги примат вакцините“,
рече Рама.
Додаде дека ова е многу значајно за да „се надмине оваа пречка и Косово да ги добие првите дози на вакцината против ковид“.
Процесот на имунизација против ковид-19, под мотото „Албанија насмевната“ почна на 11 јануари, со добиените 975 вакцини од, како што тогаш кажа Рама, пријателска земја. Во меѓувреме во Албанија пристигнати се и 22 230 вакцини од компанијата „Фајзер“ од договорените 500 илјади. До денес со имунизацијата се опфатени 23 635 лица, од нив над 4 000 лица постари од 80 години, додека останатите се здравствени работници.