Дојавите стигнаа по електронска пошта до четири училишта, по што вработените и учениците беа евакуирани и се направија антитерористички проверки
Сите дојави за бомби во четирите училишта во Скопје се лажни. Потврдата на оваа информација доаѓа од Министерството за внатрешни работи откако завршија антитерористичките проверки во сите училишта на чии мејлови беа упатени заканите за наводните бомби.
„Министерството за внатрешни работи ја известува јавноста дека се направени сите потребни проверки во врска со денешните пријави дека четири училишта на територија на Скопје добиле порака на електронската адреса со закана за поставена експлозивна направа, и утврдено е дека станува збор за лажни пријави. Веднаш по добиените пријави, од полициски службеници се преземени мерки за безбедно евакуирање на училиштата, а потоа се извршени и детални проверки од тимови за антитерористички проверки и утврдено е дека станува збор за лажни пријави“,
се наведува во соопштението испратено од МВР.
Дојавите за бомби денеска беа испратени по електронски пат до четири средни училишта по што беше извршена евакуација на учениците и вработените. Училиштата до кои беа испратени дојавите се: „Јосип Броз Тито“, „Раде Јовчевски Корчагин“, „Никола Карев“ и „Орце Николов“.
Денешните дојави беа седми по ред во изминатите две недели и сите досега се покажаа како лажни.