Даунинг стрит негира дека Стармер планира да си оди, велејќи дека неговиот став е непроменет од петокот
Се очекува британскиот премиер Кир Стармер в понеделник да објави дека ќе се повлече од функцијата премиер по огромниот притисок од пратениците на Лабуристите да му се отстапи место на Енди Барнам да стане нивни лидер, пишува британски „Гардијан“.
Премиерот и неговите сојузници со недели инсистираа дека ќе се борат против лидерскиот предизвик од Барнам или од кој било друг, пред дополнителните избори во Мејкерфилд, на кои Барнам обезбеди враќање во Вестминстер.
Денеска министерот за бизнис Питер Кајл во изјава за Скај њуз вели дека Стармер го поминува викендот размислувајќи за политичките реалности со кои се соочува.
Зборувајќи во име на владата, Кајл одби да каже какви се плановите на Стармер.
На прашањето дали Стармер планира да се повлече в понеделник, Кајл рече дека нема причина да мисли дека е така. Тој рече дека Стармер ќе размислува што ќе биде најдобро за земјата во момент како овој.
Тој не ја отфрли идејата дека промената на број 10 е неизбежна по големата победа на Бернам.
„Она што го знам со сигурност е дека тој се вклучил во разговори со широк спектар луѓе, вклучувајќи ме и мене, и дека работи навистина напорно во текот на овој викенд. Мислам дека тој размислува за политичките реалности, предизвиците и можностите во кои се наоѓа. Знаете, мислам дека тоа е она што луѓето би очекувале од него да го прави во овој момент“,
вели Кајл.
Даунинг стрит негира дека Стармер планира да си оди, велејќи дека неговиот став е непроменет од петокот.
Зборувајќи со новинарите тогаш, Стармер рече: „Ако има натпревар, само за да бидам јасен со вас, тогаш, да, ќе се кандидирам.“ Тој рече дека таков натпревар ќе направи хаос.
Откако градоначалникот на Манчестер победи на изборите во четврток со значителна разлика над Реформ, освојувајќи мнозинство од над 9 000 гласа, што е повеќе од 50 отсто, тимот на Барнам веруваше дека имаат поддршка од околу 200 пратеници на Лабуристичката партија, што е околу половина од парламентарната партија.
Оттогаш тој број се зголеми, а Барнам станува сè посигурен во крунисувањето во кое ќе ја преземе функцијата лидер на Лабуристичката партија и со тоа премиер.
Во петокот министрите претходно лојални на Стармер му рекоа дека треба да донесе одлука за распоред за неговото заминување до крајот на викендот или ќе се соочи со принуден отказ.
Вес Стритинг, поранешниот министер за здравство, кој поднесе оставка минатата недела поради фрустрација од раководството на Стармер, вети дека ќе се бори за највисоката функција и вели дека има доволен број поддржувачи, но сојузниците на Стармер и Барнам се скептични. Неговата кандидатура ќе стане помалку веројатна ако пратеници на Лабуристичката партија што се колебаат заклучат дека би претпочитале да поддржат веројатен победник и да се застанат зад Барнам.
Заминувањето на Стармер ќе значи дека Велика Британија може да го добие својот седми премиер за 10 години, само две години откако тој ги предводеше Лабуристите до убедлива победа на општите избори, освојувајќи мнозинство од 174 пратеници повеќе од другите партии.