Дел од осудените лица, кои требале наскоро да се јават на издржување казна затвор, добија привремена „забрана“ да се јават во казнено-поправните установи поради кризата со ковид-19. На денешната, 38 седница, Владата донесе Уредба со законска сила според која лицата осудени до три години затвор ќе мора да почекаат да помине летото.
„Се одлага извршувањето на упатните акти за извршување на казната затвор на лица осудени на казна затвор до три години, и тоа до 1 септември 2020 година, освен за предметите каде што постои опасност за застарување на казната. Исто така, до 1 септември 2020 година се одлага извршувањето на упатните акти кои се веќе доставени до казнено-поправните установи, освен за упатните акти за кои се веќе издадени меѓународни потерници“,
велат од Владата.
Оваа Уредба, освен што нема да важи за осудените над 3 години затвор, не ги опфаќа и правосилно осудените кои во моментов се во притвор.
„Лицата што се наоѓаат на издржување мерка притвор, по правосилноста на пресудата, веднаш се упатуваат на издржување на казната затвор“,
објаснуваат од Владата.