Нема ниту еден доказ за вината на Катица Јанева, немало еднаквост на оружјата и има суштествени повреди на постапката, тврди адвокатскиот тим на поранешната специјална обвинителка Катица Јанева на денешната јавна седница во Апелацискиот суд во Скопје, од кој бара да ја укине пресудата за случајот „Рекет“ и да го врати предметот на повторно судење.
Јанева поради здравствената состојба не дојде на седницата, па адвокатски тим, во кој е и нејзиниот син, ја образложи жалбата.
И нејзината, како и одбраната на Јовановски, ги оспоруваше сведочењата на брачниот пар Орце и Ана Камчеви.
„Камчев, главниот сведок на обвинителството, направи сè освен да сведочи. Тој дојде да дава одбрана за ‘Империја'”,
рече адвокатот Дељо Кадиев.
Ана Камчева, рече тој, кажува дека добар адвокат не е тој што го знае законот туку тој што го знае судијата.
„Не оди тој што е рекетиран самиот да бара добар адвокат што го знае судијата. Никој не му пришол да бара пари, Ана е таа која е проактивна, а агендата на Зоран Милески-Кичеец е токму таа, да оди да нуди и да го снима сето тоа“,
зборуваше Кадиев пред советот во Апелација.
И тој, исто како и адвокатот на Боки, потенцираше дека од снимките на италијанскиот весник „Ла Верита“, кои потекнуваат од домот на Камчев, нелогично е со каква леснотија Кичеец ја носи торбата „луј витон“ со наводниот еден милион евра, бидејќи таа би требало да тежи околу 25 килограми со оглед дека бизнисменот сведочеше дека 80 проценти од парите биле во апоени од по 50 евра.
„Се гледа дека Зоран Милески Кичеец со два прста ја носи торбата, а со други два држи клуч. Обвинителството вели дека не може да ја знаеме физичката сила на Милески, но далеку од здравата логика е дека ваквото нешто може да биде така“,
рече Кадиев.
Внимание на снимките обрати и адвокатката Ирена Фрчковска, која постави реторичко прашање како Камчев со мобилен снимал дека ги става парите во торба, а не го снимал примопредавањето.
„Зарем тој што дава милион евра и снима во неговата куќа не би го снимал и актот или чинот на предавање на самите пари? Ние акт на предавање не видовме. Докази дека се дадени пари нема, обвинителството не направи напор за да изведе каков било доказ дека сведоците дале пари. Обвинителството не направи напор ниту да ги прибави изводите од сметките во банките од каде што Камчеви ги ваделе парите. Вие да извадите 38 милиони денари и да не доставите ниту еден доказ дека такви пари се дале?“,
рече адвокатката.
Пред адвокатскиот тим на Јанева, во судница се обрати и бранителот на Бојан Јовановски, Сашко Дукоски. И тој побара укинување на пресудата од Основниот кривичен суд во Скопје.