Иако решението за нејзино уривање е донесено уште во 2015 година, тоа успешно се избегнува шест години и, ако вчера донесениот закон стапи на сила, најверојатно и ќе преживее
Откако Собранието вчера го донесе новиот Закон за утврдување правен статус на бесправно изградените објекти со кој се овозможува легализација на нови дивоградби и неуривање на постојните, но и амнестија од одговорност на оние што граделе незаконски, а кои веќе кривично се гонат, листата на градби што ќе куртулат се зголемува. Меѓу нив е и терасата на седиштето на најголемата опозициска партија ВМРО-ДПМНЕ.
Иако решението за нејзино уривање е донесено уште во 2015 година, тоа успешно се избегнува шест години и, на крајот, можно е да преживее.
„По предлог на овластениот градежен инспектор на Општина Центар, градоначалникот на Општината го поништи решението во тек на градба за седиштето за објектот на ул. ‘Ѓуро Стругар’ ББ, во кој едниот дел е наменет за деловни дејности, а другиот е хотелски комплекс. Објектот за деловни дејности е, всушност, седиштето на партијата ВМРО-ДПМНЕ. По одлуката на градоначалникот, ќе следува решение за отстранување на диво изградената тераса“,
е наведено во соопштението на општина Центар од ноември 2015 година.
Во него се објаснува дека градежна инспекција на општина Центар излегла на самото место и направила увид, при што е констатирано дека не се работи за настрешница, туку за тераса која е изградена без одобрение.
„И од проектот на ‘Бетон’ се гледа дека се работи за тераса, бидејќи на проектот е нацртан човек кој се движи по терасата и влез од терасата кон внатрешноста на објектот“,
посочија тогаш од Општина Центар за објектот кој е именуван како „Палата Христо Татарчев“ или во јавноста познат како Белиот дворец.
Кочо Стојчески, тогашен раководител на Секторот за инспекциски работи во Општината, изјави дека ВМРО ДПМНЕ има рок од 30 дена да ја урне дивоизградената тераса на партиското седиште, а во спротивно Општина Центар ќе побара асистенција од полицијата за уривање на објектот.
Еден месец подоцна и тогашниот градоначалник на Центар, Андреј Жерновски, уверуваше дека терасата на новото седиште на ВМРО-ДПМНЕ е нелегално изградена и затоа ќе биде урната, но дека се чека да заврши постапката на градежната фирма „Бетон“, која ја обжалила одлуката на Општината.
„Завчера добивме документ од Министерството за транспорт и врски, каде второстепената комисија ја уважила жалбата на ‘Бетон’. За да се спречи она што го најавивме, ‘Бетон’ вложил жалба, така што ќе почекаме тоа да заврши, но ве уверуваме дека ние до крај ќе ја истераме онаа одлука, а тоа значи дека ќе рушиме се што е дивоградба во Центар“,
изјави тогаш Жерновски.
Со Законот за утврдување правен статус на бесправно изградените објекти што вчера го изгласа Собранието со 72 гласа „за“ , тројца „воздржани“ и петмина „против“, се предвидува да се опфатат сите дивоградби изградени до денот на неговото стапување во сила. Претседателот Стево Пендаровски го разгледува Законот и допрва ќе соопшти дали ќе го потпише указот за негово прогласување или ќе го употреби правото на „суспензивно вето“.
Груби по случајот „Мавровка“: Треба да се урне и терасата на ВМРО ДПМНЕ
Последен пат кога се спомна уривањето на терасата беше лани во септември, кога се уриваше дивоградбата кај „Маровка“. Тогаш првиот заменик-претседател на Владата, Артан Груби, рече дека не смее да има селективна правда и дека треба да се урне сѐ што е дивоградба, па и терасата на седиштето на ВМРО-ДПМНЕ.
„Мора да се почитува законот и ќе видите апсолутен фокус на неселективна правда, ако има незаконско изградено седиште на партија, ако има дивоградба во Тетово, Гостивар, Струга, ќе има постапка. Но, многу е важно да не постапува партијата туку тоа да го прават институциите. Си има суд, Обвинителство, Градежен инспекторат“,
рече Груби за време на инспекцијата на активностите кај „Мавровка“.
Од жолта зграда до дворец
Целокупната изградба на палатата на ВМРО ДПМНЕ, од купувањето на земјиштето, до ненадејното речиси двојно зголемување на габаритот, беше проткаена со проблематични чекори.
Седиштето се простира на површина на две парцели кои партијата ги купила во време кога беше на власт.
Во истражување на „Призма“ од 2016 година „Како жолтата зграда прерасна во неокласичен дворец“ хронолошки се објаснува растот на „штабот“.
Се започнува во 2007 година кога советниците во Центар го смениле ДУП и околу тогашната жолта зграда од 200 квадрати, нацртале нова градежна парцела од 1 200 квадрати. Прво требало да биде тоа зграда од шест ката на површина од 700 метри квадратни.
На почетокот на 2008 година Катастарот ги прекројува и спојува парцелите со што партијата може да ги купи со еден договор. Тоа се случува во јуни 2009 година кога Миле Јанакиески како министер за транспорт и го продава земјиштето на партијата за нешто повеќе од 130 000 евра или за 110 евра по квадрат. Тоа е цена далеку пониска од пазарната во центарот на главниот град, ако се спореди дека Министерството наредната годна во центарот на Скопје продаде земјите на јавна аукција за 3 000 евра по квадрат.
Партијата всушност го искористила Законот за градежно земјиште односно одредбата според која сопствениците на легалните објекти може да ја приватизираат целата градежна парцела со договор во 4 очи според цените што ги одредува Владата, а неа во тоа време ја води ВМРО-ДПМНЕ.
Тоа се единствените пари кои партијата ги вложила за изградба на зградата, бидејќи подоцна го ангажираше „Бетон“ АД Скопје како коинвеститор.
Во следните години со неколку промени на ДУП – от за Мал Ринг габаритот на објектот пораснал од 700 на 1 200 квадратни и висина од 25 на 29 метри, од шест ката со приземје на осум со приземје и поткровје, на кое подоцна е додадена фамозната тераса.
Додека траеле подготовките за новото седиште се случија локалните избори на кои партијата по повеќе од една деценија ја загуби власта во Општина Центар.
Во јули 2019 година Кривичниот суд го одобри обвинителниот акт за случајот „Талир 2“, кој се однесува на незаконска изградба на седиштето на ВМРО-ДПМНЕ. Во „Талир 2“ осомничени се екс премиерот Никола Груевски и поранешниот владин генерален секретар Кирил Божиновски.
Според обвинението Груевски и Божиновски ја злоупотребиле службената положба, за да му овозможат на правното лице ДГ Бетон АД Скопје да го изгради седиштето на партијата, иако правното лице во времето на обезбедување на услугата имало склучено договори за јавни набавки со државни органи и јавни установи или претпријатија спротивно на Законот за политички партии, Законот за финансирање на политички партии и Законот за облигациони односи.