На самитот учествуваше и претседателот Пендаровски кој посочи дека очекува за забрзување на интеграцијата на Западен Балкан во ЕУ да придонесе самитот на Европската политичка заедница закажан за октомври годинава. Исто така, истакна и дека е неопходен пристап на земјите од регионот до механизмите на ЕУ за справување со кризата
Побрза интеграција на Западен Балкан во ЕУ и Унијата да му помогне на регионот во справувањето со енергетската и економската криза, побараа лидерите на балканските земји на денешниот самит на Процесот Брдо-Бриони што се одржува во Крањ, Словенија.
Ова се само два од вкупно шесте усвоени заклучоци кои словенечкиот претседател Борут Пахор ги објави на Твитер:
„1. Повторно ја нагласуваме важноста на проширувањето на ЕУ како најдиректен придонес за одржување на мирот и стабилноста во регионот, што е повеќе од кога било геополитичко прашање;
2. Се залагаме за побрз процес на интеграција во ЕУ согласно добро познатите услови за членство.
3. Повикуваме на доделување кандидатски статус на Босна и Херцеговина до крајот на 2022 година;
4. Повикуваме на воспоставување безвизен режим за целиот Западен Балкан до крајот на 2022 година;
5. Ја повикуваме ЕУ да застане на страна на Западен Балкан во ублажувањето на последиците од економската и енергетската криза;
6. Ја потврдуваме нашата посветеност на дијалогот како единствен начин за надминување на разликите и отворените прашања во регионот“,
се заклучоците што ги објави Пахор.
Претседателот на Словенија беше домаќин на денешниот самит на Процесот Брдо-Бриони заедно со хрватскиот колега, Зоран Милановиќ.
На Самитот во Крањ учествуваше и претседателот Стево Пендаровски, како и претседателите на Србија-Александар Вучиќ, Косово – Вјоса Османи, Црна Гора – Мило Ѓукановиќ, Албанија – Бајрам Бегај и тројцата членови на Претседателството на БиХ – Жељко Комшиќ, Милорад Додик и Шефик Џаферовиќ.
За самитот за наредната година, пак, за домаќин се понуди претседателот Пендаровски кој посочи дека земјата е подготвена да биде домаќин на Процесот Брдо-Бриони.
Во врска со дискусијата на самитот и заклучоците, тој посочи дека очекува за забрзување на интеграцијата на Западен Балкан во ЕУ да придонесе самитот на Европската политичка заедница закажан за октомври годинава.
„Проширувањето на Европската Унија, посочи претседателот Пендаровски придонесува за одржување на мирот и стабилноста во нашиот регион, за подобрување на демократијата, владеењето на правото и заштитата на човековите права и слободи, и затоа е неопходно забрзување на интеграциските процеси на сите земји од Западен Балкан. Во таа насока, претседателот Пендаровски изрази очекување претстојниот состанок на Европската политичка заедница, што треба да се одржи во почетокот на октомври, да придонесе за натамошно забрзување на интеграцијата“,
соопштија од кабинетот на Пендаровски.
Шефот на државата порача и дека Босна и Херцеговина заслужува да добие кандидатски статус за ЕУ, а Косово да добие безвизен режим. Исто така, истакна и дека е неопходен пристап на земјите од регионот до механизмите на ЕУ за справување со кризата.
„Претседателот Пендаровски потенцираше дека на земјите од Западен Балкан им е неопходен пристап до механизмите на ЕУ што поскоро, како поддршка за справување со претстојната енергетска криза, и посочи дека економската и социјалната криза може да предизвикаат повеќегодишна политичка криза и да генерираат дополнителна нестабилност. Со цел да се ублажат негативните ефекти од војната во Украина, претседателот Пендаровски апелираше на засилена соработка и дијалог“,
додаваат од неговиот кабинет.