Тој во изјава за новинарите кажа дека се согласил на договор за размена на Навални пред тој да почине во арктичкиот затвор. Ова е, како што забележува Би-би-си, првпат по неколку години Путин јавно да го изговори името на својот најжесток критичар
По извесниот резултат од тридневните избори ново-стариот претседател на Русија, Владимир Путин, одржа говор во кој им се заблагодари на граѓаните на земјата за дадената доверба на претседателските избори викендов, кои голем дел од западните земји ги оценија како ниту фер ниту слободни.
Заблагодарувајќи им се на граѓаните, тој рече дека неговата победа на земјата ќе ѝ овозможи напредок.
„Пред нас имаме многу специфични и важни задачи. Резултатот од изборите означува доверба од страна на граѓаните на земјата и нивната надеж дека ќе работиме онака како што планираме. Сакам да ви се заблагодарам на сите вас, на сите граѓани на оваа земја, за поддршката и довербата“,
рече Путин во своето обраќање кое беше поздравено со аплауз од неговите поддржувачи кои извикуваа „Русија, Русија“.
Путин во своето обраќање, по очекуваното освојување на петтиот претседателски мандат, рече дека ќе ги зајакне руските вооружени сили и ќе даде приоритет на, како што ја нарече, „специјалната воена операција“ на Русија во Украина.
Тој рече дека неговата победа покажува дека Русите се обединети и дека нема да бидат заплашени, пренесува британскиот национален сервис.
„Колку и да се обидуваат да нè исплашат, да ја потиснат нашата волја, нашата совест, никој никогаш не успеал во историјата. Не успеаја сега, а нема да успеат ниту во иднина“,
им рече рускиот лидер на приврзаниците во изборниот штаб.
Рускиот претседател во дел од говорот ги критикуваше протестите наречени „Пладне против Путин“, кои беа организирани од Јулија Навални, вдовицата на ненадејно починатиот опозициски лидер Алексеј Навални, кои се одржаа во неколку руски града, како и пред амбасадите на Русија во неколку странски земји.
Тој во изјава за новинарите кажа дека се согласил на договор за размена на Навални пред тој да почине во арктичкиот затвор. Ова е, како што забележува Би-би-си, првпат по неколку години Путин јавно да го изговори името на својот најжесток критичар.
Кремљ доцна вчера објави дека рускиот лидер обезбедил уште еден шестгодишен мандат освојувајќи 87 отсто од гласовите на претседателските избори кои траеја три дена.
Инаку, Путин владее со Русија од 2000 година и е лидер со најдолг стаж на Кремљ, по оној на советскиот диктатор Јосиф Сталин.
Официјални претставници на повеќе западни земји вчера излегоа со критики за изборите во Русија велејќи дека не биле ниту слободни ниту фер.
Украинскиот претседател Володимир Зеленски го нарече Путин диктатор кој е „пијан од власт“.
„Нема зло што тој нема да го направи за да продолжи својата лична моќ“,
рече Зеленски.
Во Соединетите Американски Држави (САД), портпаролот на Белата куќа рече дека изборите очигледно не биле слободни и фер со оглед на тоа како Путин затвора политичките противници и ги спречува другите да се кандидираат против него.
Шефот на британската дипломатија Дејвид Камерон во објава на социјалната мрежа Икс го критикуваше гласањето во Русија велејќи дека вака не изгледаат слободни и фер избори.
Министерството за надворешни работи на Германија го нарече гласањето во Русија „псевдоизбори“, а владеењето на Путин авторитарно, кое се одржува преку цензура, репресија и насилство.
Во меѓувреме од полското Министерство за надворешни работи рекоа дека е невозможно да се направи слободен и демократски избор во Русија.
Од друга страна, пак, севернокорејските државни медиуми објавија дека лидерот на земјата Ким Џонг Ун му испратил на Путин порака во која му ја честита победата.
Честитка за победата на Путин стигна и од кинеското Министерството за надворешни работи.
„Цврсто веруваме дека под стратешкото водство на претседателот Си Ѓинпинг и претседателот Путин, односите меѓу Кина и Русија ќе продолжат да се движат напред“,
се наведува во честитката на кинеското МНР, пренесува Би-би-си.