Во изјава за Ројтерс, шефицата на бугарската дипломатија настапува со ставови што соодветствуваат на информациите што ги пласира бриселски „Политико“ за наводен бугарски компромис за официјален старт на преговорите на нашата земја со ЕУ
Бугарија не го оспорува правото на Република Северна Македонија на самоопределување, ниту нивното право да го нарекуваат својот јазик како што сакаат. Ние сме подготвени да ја потврдиме сегашната реалност, но тие треба да ја признаат „историската вистина“.
Ова го изјави за Ројтерс вицепремиерката и министерка за надворешни работи на Бугарија Екатерина Захариева.
„Нашата загриженост е поврзана со постојаните тврдења на С Македионија кон македонско малцинство во нашата земја. Ако тие ги препознаат корените на нивната нација и јазик, ова ќе заврши“,
додаде таа.
Захариева потсети дека Бугарија го фокусираше својот прв период од ротирачкото претседателство со ЕУ во 2018 година на забрзаниот пристап на земјите од Западен Балкан во 27-члениот блок. Но, таа може да стави вето на официјалниот почеток на пристапните разговори со Северна Македонија следниот месец, ако двете страни не можат да го решат прашањето.
Шефот на дипломатијата Бујар Османи изјави вчера дека очекува следната седмица да се обезбеди, како што вели, формат за средба со неговата бугарска колешка, бидејќи, посочува, навистина се ближат деновите кога Советот на ЕУ треба да донесе одлука.
Бриселски „Политико“ неделава објави куса информација за наводен „бугаски компромис“ за официјален старт на преговорите на нашата земја со ЕУ, така што Бугарија би ги признала македонскиот јазик и идентитет, а С Македонија би ја признала „историската вистина“ – дека јазикот и идентитетот имаа бугарски темели.
Претседателот Стево Пендаровски и премиерот Зоран Заев тогаш тврдеа дека немаат такви информации од состанокот на амбасадорите на ЕУ.