Владите на Северна Македонија и САД денеска потпишаа Меморандум за разбирање и за безбедност на 5Г технологијата.
Потписите на документот ги ставија премиерот Зоран Заев и потсекретарот за економски раст, енергија и животна средина на САД Кит Крач.
Со меморандумот Северна Македонија и САД, рече премиерот, ја потврдуваат својата желба да ја зајакнат соработката поврзана со спроведување на 5Г технологијата која е во согласност со нашиот национален оперативен бродбенд план што е усвоен минатата година како стратешки документ на земјава за новата ера на дигитализацијата на земјава.
„Република Северна Македонија како кандидат за членство во ЕУ има обврска да ги усогласи националните политики за развој на електронските комуникации со политиките на ЕУ, како и нашите политики за безбедносните аспекти на имплементацијата на 5Г технологијата со нашиот стратешки партнер и сојузник во НАТО, САД. Меморандумот е од витално значење за идниот просперитет на нашата земја од економски аспект, како и за националната безбедност“,
рече Заев.
5Г, оцени премиерот, ќе овозможи огромна низа на нови апликации, вклучително и обезбедување на клучни услуги за јавноста и ќе биде од корист и за граѓаните и за економијата, а ќе се олеснат и прекуграничните услуги и трговијата.
„Кога зборуваме за дигитализацијата како за четврта револуција, 5Г мрежата ќе предизвика многу попозитивни ефекти отколку појавата на електричната енергија и ќе биде инструмент за трансформација односно за дигитализација на традиционалните индустрии. Северна Македонија и САД ја нагласуваат важноста за поттикнување учество на релевантни и доверливи мрежни добавувачи на хардвер и софтвер на 5Г пазарите, земајќи ги предвид проценките за ризик, и промовираат рамки кои ефикасно ги штитат 5Г мрежите од неовластен пристап на трети страни“,
рече Заев.
Крач рече дека ваквите меморандуми за 5Г се доказ дека светот се освестува за опасностите и ризичните продавачи. Безбедните 5Г мрежи, нагласи тој, ќе бидат од витално значење за економскиот просперитет и стабилност во регионот.
„Северна Македонија сега се приклучи на 27-те од 30-те земји-членки на НАТО кои се дел од чистата мрежа“,
рече Крач.
Тој рече и дека од 27 земји во ЕУ, 25 се приклучени во оваа „чиста мрежа“.
Според потсекретарот на САД, тоа е нешто повеќе од 5Г, тоа ги покрива електричните возила, апликациите на нашите телефони …
„Чистата мрежа е сеопфатен пристап да се адресираат долгорочните закани за приватноста, безбедноста, соработката и човековите права. Таа е вкоренета во меѓународните доверливи стандарди, ова е долгогодишно спроведување на оваа стратегија исега се гради една коалиција. Ова е од клучно значење“,
рече Крач.
Со меморандумот кој беше потпишан земјава се обврза дека нема да користи 5Г технологија од „непроверени и некредиблни“ производители. Со други зборови, со овој меморандум во Северна Македонија ќе се оневозможи инсталирање чувствителна телекомуникациска опрема која може однадвор да биде злоупотребена за собирање податоци за македонските граѓани. Засега, со ваквите меморандуми кои САД ги потпиша со Франција, Велика Британија, Холандија, Данска, Норвешка, најмногу се погодени кинеските телекомуникациски гиганти „Хуавеј“ и „ЗТЕ“.
Пред еден месец „360 степени“ истражуваше на оваа тема и дојде до сознанија дека најголемиот телекомуникациски играч во земјава – Телеком, е во процес на набавка на нова опрема, меѓу другото, и за 5Г-мрежа и дека на тендерската постапка прворангиран бил токму кинески „Хуавеј“. Државата, која има 35% од акциите во Телеком, преку своите претставници во бордот, го отворила прашањето за можниот влез на „Хуавеј“ во идната 5Г-мрежа.