Постепено нашата држава влегува во критична фаза, која од стручните лица е оценета како најтежок и најсериозен период од пандемијата, оцени лидерот на СДСМ, Зоран Заев, во видеообраќање откако Владата вчера донесе поригорозни мерки за справување со коронавирусот.
„Пред нас е најголемиот предизвик во борбата со коронавирусот во кој се очекува достигнување на пикот на бројот на заразени. Затоа, потребна е многу голема лична одговорност, на секој од нас и максимална посветеност во заштита на нашето здравје, на здравјето на нашите најблиски, на нашите деца, родители, роднини, пријатели. Донесени се нови, по заострени мерки од страна на Владата и исклучително е важно нивно целосно почитување. Само така секој човек, секој поединец, секој од нас ќе придонесе во заедничката борба. Да сториме сè, преку целосно почитување на мерките и препораките, да го спречиме ширењето на вирусот. Ајде да си помогнеме себеси, да им помогнеме на нашите најблиски, да им помогнеме на здравствените работници, на институциите на системот“,
нагласува Заев.