Документацијата е во делот на подготовката во однос на „Фајзер“, Њујорк, кон Србија, не е документација кон нас, рече премиерот Зоран Заев за вакцините чија испорака требаше да се случи вчера, но се одложи поради усогласување на техничката документација.
„Се работи за подготовка на техничката документација од ’Фајзер‘ кон Србија за реекспорт или донација. Целта е да стигнат прво овие 4 000 вакцини, па после и другите 4 000. Раководството на Србија, претседателот Вучиќ и премиерката Брнабиќ, сакаат час поскоро да го направат тоа, затоа вака излегоа во најава. Првиот дел беше договорот каде што се забранува реекспорт, односно препродавање на друга земја, па одлучија да го донираат само да почне целиот процес. Но, за жал, сè уште ги чекаме овие одобрувања од ’Фајзер‘“,
изјави Заев.
Тој вели дека Северна Македонија не е единствената која нема добиено вакцини, туку тоа е случај со целиот Западен Балкан, односно и со Албанија, Косово, Босна и Херцеговина и Црна Гора.
„Србија го има седиштето на ’Фајзер‘ и секако има успеано, и добро е што успеа да набави вакцини. Земјите од Западен Балкан, кои се кандидати за членство, освен Србија, сè уште чекаме да набавиме вакцини преку системот Ковакс, преку директни договори со ’Фајзер‘, директно преку ЕУ – 70 милиони евра кои Вархеји ги понуди за да го платат процесот. Албанија објави дека добила некои 1 000 вакцини, не објави како или што, но тоа е неофицијално добивање. Знаете дека сме пред плаќање кон Кина за да може да добиеме и вакцини од Кина. Очекуваме час поскоро која било од тие опции да биде остварена“,
изјави Заев.