Во повеќе наврати изминатиот период кажав дека немам политички амбиции и би сакал уште еднаш да ги демантирам ваквите инсинуации за мое повторно политичко ангажирање. Јас нема да поднесам ниту ќе прифатам кандидатура за претседател на државата
Поранешниот премиер и претседател на СДСМ, Зоран Заев, денеска преку фејсбук-статус се огласи по информациите кои изминатите денови кружат во јавноста дека имал некаков „пеколен план“ за пуч во СДСМ, според кој требало да има избори по кои СДСМ и ВМРО-ДПМНЕ ќе направеле заедничка влада, а тој би требало да биде претседателски кандидат во 2024.
„Во повеќе наврати изминатиот период кажав дека немам политички амбиции и би сакал уште еднаш да ги демантирам ваквите инсинуации за мое повторно политичко ангажирање. Јас нема да поднесам ниту ќе прифатам кандидатура за претседател на државата. Како претседател на СДСМ ја обединив партијата. А, обединетиот СДСМ заедно со граѓаните урна режим и тоа баш кога тој режим беше најсилен и најразулавен. Јас никогаш нема ниту да помислам да го делам СДСМ, ниту да правам некаков си измислен пуч во СДСМ или било што слично. Доказ за тоа е моето осум и пол годишно раководење со партијата како и државните и изборните победи што ги освојуваше обединетиот и сплотен Социјалдемократски сојуз на Македонија, заедно со силното граѓанско општество“,
пишува Заев.
Истовремено, додава тој, македонската Влада предводена од СДСМ не престана да испишува историски успеси.
„Ја внесовме Северна Македонија во НАТО, ги решивме домашните меѓуетнички тензии и поделби, станавме пријатели со сите наши соседи и со целиот демократски свет. Благодарение на политичките на градење пријателство со соседите, но и севкупните меѓународни политики ја добивме Автокефалноста на нашата МПЦ-Охридска Архиепископија, станавме една од трите држави кои ја основаа економската иницијатива Отворен Балкан и започнавме преговори со ЕУ“,
додава тој.
Меѓу другото, Заев во својата објава говори и за тоа како политичките опструкции и блокади, како што ги нарекува противења, кочења, негодувања, мрчења, суетности, всушност, помогнале во клучните процеси.
„Не може да се заборави дека и тогаш имаше противници на се што работевме и на се што постигнавме. Некои беа против само поради тоа што тие во нивното време не успеале да го направат она што ние за четири години го постигнавме заедно со народот. Убавината на сите овие противења, кочења, негодувања, мрчења, суетности, вака од дистанца гледано, е во тоа што токму тие луѓе, со своето противење, несакајќи, а богами некои од нив и свесно и намерно (Груевски на пример) ги имаат помогнато сите овие процеси. Сите тие, со нивното делување и противење, го охрабрија мнозинството народ да опстои во својата верба за осигурување на евроатлантската иднина на државата, во градењето пријателството со соседните земји, во воспоставување на кохезијата во нашето мултиетничкото општество преку концептoт на кој му аплаудира целиот демократски свет – концептот ‘Едно општество за сите’“,
додава Заев.
Според него тие луѓе, политичари, новинари, аналитичари, индиректно, но и директно во клучните моменти за државата помогнале за обезбедување дури и на двотретинско мнозинство во парламентот за Договорот од Преспа и другите важни одлуки.
„Колку и да не сакаме, мораме да признаеме дека треба да им бидеме благодарни на тие луѓе кои беа и се уште се противници на сите големи успеси што ги постигнала Македонија и целиот македонски народ, затоа што токму со нивното јавно делување, пишување и противење всушност ги помогнаа овие големи македонски успеси. Тие беа една од главните причини за од спротива да се формира силниот демократски блок кој ја носи земјата напред. Посебна благодарност до некои од тие луѓе што и директно го помогнаа клучниот чин за земјата неповратно да се постави на шините кон НАТО и ЕУ, чинот со кој 80 пратеници дадоа согласност за Договорот од Преспа“,
додава Заев во фејсбук-статусот.