Премиерот Заев порача дека неосновани се критиките од ВМРО-ДПМНЕ за новиот пакет економски мерки и посочи дека нема шанса за соработка со Христијан Мицкоски, бидејќи како што рече, тој „разговара за да не се договара“
Пакетот на антикризни мерки е за добробит на граѓаните и за да ја спасиме економија. Не е се за критика, нешто е за поддршка, изјави премиерот Зоран Заев во интервју за ТВ Стар коментирајќи ги обвинувањата на опозицијата за четвртиот пакет мерки за справување со последиците на ковид- кризата.
„Мерките беа вистински дизајнирани да помогнат да сочуваат работни места. Знаете опозицијата викаше дека ќе има 140 000 нови невработени, 12 300 се, ама ме боли душата за секој човек од тие 12 300. Сега во новиот пакет мерки велиме – вратете ги луѓето, аплицирајте за помош, се со конечна цел да мотивираме. Сите пари што ги пуштаме се за граѓаните – дали се работници, дали приматели на социјална помош, пензионери, пасивни баратели на работа и слично сето тоа е да го одржиме економскот живот во тешко време со солидарност. Главната порака е дека државата е тука“,
рече Заев.
Заев рече дека лидерот на ВМРО-ДПМНЕ, Христијан Мицкоски излегол на прес-конференција половина час по објавување на мерките, обвинувајќи дека не се добри и дека со него нема можност за соработка.
„Немал време ниту да ги прочита и вели ништо не чини..ВМРО-ДПМНЕ не предложи ништо. Се што ќе предложат ќе прифатиме. Ние прифативме се што предложија експертите, стопанските комори…Ова е според мене е голо критизерство без аргументи. Не можете да седнете со Мицкоски да разговарате, тој разговара за да не се договара“,
рече Заев.
Премиерот истакна дека опозицијата треба да биде буден следач на работата на власта, коректив на нејзината работа, а ВМРО-ДПМНЕ вели, продолжува со злокобни зборови на омраза.
„Тоа можам да го објаснам само со самобендисаност, нарцисоидност, фрустрација само да се додржи во фотелјата во Белиот дворец, претседател на ВМРО-ДПМНЕ, се гази пред себе, тоа не добро. Ако опозицијата е слаба – лошо е за државата, лошо е за СДСМ, да има добра опозицијата е ќар за граѓаните. Ние можеме да продолжиме и вака, државата пак ќе оди напред и СДСМ ќе победува, ВМРО- ќе губи, но посакувам да работам заедно со опозицијата, да почувствува дека сите заедно сме одговорни“,
рече Заев.