Мандатарот Зоран Заев ќе биде премиер во следните четири години, а ДУИ ќе може да предложи премиер-Албанец во последните 100 дена од новата влада. Ова е договорот што го постигнале Заев и Ахмети за клучната позиција, која е предизборно ветување на интегративците. Поделбата на ресорите дополнително ќе се утврдува
Меѓу СДСМ и ДУИ е постигнат коалициски договор за создавање на парламентарно мнозинство и состав на новата Влада со полн мандат, соопшти мандатарот Зоран Заев. Тој вели дека во следните 4 години ќе работи посветено на интересите на државата.
„Дел од принципите на кои се темели новиот коалициски договор се: одговорни и отчетни кадри за сите ресори, рамноправно учество на мажи и жени во извршната власт, нема да се предлагаат министри без ресор, јакнење на економскиот стандард, неселективна борба со криминалот и корупцијата на сите нивоа, проверка на имотот на функционерите и намалување на привилегиите, зголемување на транспарентноста и отчетноста на сите нивоа на власта, заштитата на животната средина. Ќе се намали обемот на администрацијата за 20 проценти, а сите вработени по Рамковен договор ќе тргнат на работа“,
кажа Заев.
Со тоа што ја добива премиерската позиција, Заев вели дека ДУИ покажале доблест, па за возврат, без да се консултира со сопартијците и тој предложил ДУИ да застане на премиерската позиција на последните 100 дена пред следните избори.
„ДУИ покажа големина и доблест заради иднината на сите граѓани и државата и утврдено е јас да ја добијам честа да бидам претседател на Владата во полн четиригодишен мандат. Без какви било претходни консултации во коалицијата, покажав доблест, на предлог на ДУИ да се постави премиер кој ќе ги води последните 100 дена од редовниот мандат. Таа доблест денеска во партијата ќе ја елаборирам“,
рече Заев и најави укинување на техничката влада со просто мнозинство во Собранието.
Ахмети повика институциите што поскоро да се конститутираат, поради пандемијата со ковид-19.
„Многу сум сигурен дека денешната наша одлука ќе биде поздравена од сите граѓани на нашата земја. Секако дека ќе биде поздравена и од нашите партнери од Меѓународната заедница кои многу ни помогнаа за нашиот пат во НАТО и кон ЕУ. Значајно е што денешната коалиција ќе се заснова на здрави темели и ќе придонесе за сите процеси во државата. Убеден сум дека денеска ќе ги услужиме сите наши граѓаните и дека ова партнерство ќе биде од најуспешните. На идната Влада и посакувам успех успешна работа“,
кажа Ахмети.
Договорот ќе биде презентиран пред највисоките органи на СДСМ и ДУИ во текот на денешниот и утрешниот ден.