Пописот во земјава успешно ќе заврши во предвидениот рок, смета премиерот и лидер на СДСМ, Зоран Заев, додека пак, лидерот на опозициската ВМРО-ДПМНЕ, Христијан Мицкоски, смета дека во процесот има проблеми.
„Пописот овојпат ќе успее. Досега се попишани преку 1,1 милион граѓани, а ни остануваат упте десетина дена. Наспроти тврдењето на опозицијата и на Мицкоски дека ќе има масовна зараза, го докажавме спротивното. Докажавме дека и за време на ковид оваа статистичка операција може да се спроведе. Народот е одговорен, се почитуваат сите мерки и протоколи. Попис може да се реализира ако се сака. Тоа е големата разлика меѓу оваа и власта на ВМРО-ДПМНЕ која не успеа да спроведе попис“,
рече Заев во Тв-дуелот со Мицкоски на Канал 5.
Мицкоски возврати дека апликацијата за попишување во континуитет имала технички проблеми и дека власта тоа добро го знае.
„Пописот има многу проблеми и тоа Заев го знае. Апликацијата континуирано изминатите 15 дена паѓаше и попишувачите на терен не можеа да ја користат 24 часа. Тоа е факт“,
рече Мицкоски.
Во врска со попишувањето на дијаспората, Заев потенцира дека важат стандардите на ЕВРОСТАТ.
„Сите тие се наши граѓани, имаат државјанство и сите влегуваат во пописот само јасно се разграничува: кои се резиденти, кои се нерезидентни“,
рече Заев.
На прашањето дали ВМРО-ДПМНЕ ќе ги признае резултатите од пописот, Мицкоски не одговори конкретно.
„Како можеме да признеме нешто што не сме виделе? Допрва има период кога ќе се вкрстува тоа со базите на податоци. За една година од сега ќе излезат тие податоци. Но, првата контрола ќе бидат локалните избори и фингер принт терминалите“,
рече Мицкоски.
На тоа Заев рече дека ВМРО-ДПМНЕ ветиле дека ќе ги признаат резултатите уште кога меѓу нив паднал договор за тоа кога да се одвива попишувањето.