Охридскиот советник Усеини ќе одговара пред законот, дури и по цена на мнозинството во општинскиот совет – порача денеска премиерот Заев, прашан за вчерашниот напад врз професорот Илјаз Илјази од страна на охридскиот советник од ДУИ, Нефи Усеини. За дивоградбите на Усеини пак, порача дека општината веќе издала решение за уривање.
„ Без разлика за кој се работи, да е од СДСМ, од свети СДСМ, од каде сака нека е, ако се огрешил од закон – законите важат еднакво за сите. Општина Охрид веќе има издадено решение за отстранување. Се очекува извршувањето да почне. Ако немаат храброст, ако немаат можност или не можат тоа да го завршат, тогаш согласно закон се одземаат ингеренциите и Владата ќе постапи. Јас ве уверувам дека дивоградбите ќе се отстранат. А ако има физички напад, тука министерството за внатрешни работи отвора истрага и секој ќе си одговара, никој нема да биде заштитен. Јас не сакам да судам по делот на документации за дивоградби, по делот на вина, по делот за напад или слично, тоа ќе го покажат истрагите кои се водат. Но, ве уверувам дека предрасуди и резерви нема да имаме кон никого. Впрочем, не е на крај на денот да падне и мнозинството во општината, го кажувам ова отворено, има многу градоначалници кои се предложени од СДСМ а ги избрале граѓаните, а сепак со совети во кои нема СДСМ или владејачката коалиција контрола, и општините функционираат добро. Ние немаме резерви дали ќе изгубиме мнозинство или било што, или дали со некого ќе продолжиме соработка или не. Се работи прво за почитување на законот. Тие што се учесници во политичкиот живот, претставници на политички партии, па уште ако се претставници на владејачките партии треба да бидат пример и да го почитуваат законот.“,
порача Заев.
Вицепремиерот за европски прашања, Бујар Османи, рече дека ДУИ се обидува во комуникација со Усеини да добие појасна слика што се случило. На својот сопартиец Османи му порача дека партијата нема да штити никого. За дивоградбите, вели дека најважно е уривањето да биде неселективно и да не се партизира.
„Одговорот од таму беше дека доколку се почне со неселективно рушење на дивоградбите, ќе го цитирам: ќе ја имаме честа да почнеме од него со рушењето. Неселективниот пристап е најважен и обидот да се партизира или политизира еден погрешен пристап на одредени бизниси или пак луѓе во текот на изградбите. Пред законот сите ние сме со име и презиме, не сме претставници на ниту една политичка партија, ниту на заедниците, туку со име и презиме, дали почитуваме или не закони. Доколку некој го прекршил законот треба да се делува и ДУИ нема да заштити никого. Мислам дека не треба да има предрасуди врз основа на локални политички борби таму, кои тука во Скопје се пренесуваат во разни форми. ДУИ ќе ги анализира информациите за да се види вистината за овие случувања и ако има прекршувања ДУИ ќе го сочува својот имиџ и својот став во однос на почитување на законите.“,
вели Османи.
По вчерашниот физички напад на Усеини врз професорот Илјази се огласија невладините, но и ВМРО-ДПМНЕ и Алијансата за Албанците – сите порачаа дека е крајно време да се стави крај на самоволието кое советникот го спроведува со месеци наназад.