ВМРО-ДПМНЕ обвини дека прекинот на транспортот на јаглен од рудникот Суводол до РЕК Битола не епоради дождовите како што беше соопштено вчера, туку хаваријата се случила како резултат на неодговорно и нестручно работење на власта. Од РЕК Битола пак, возвратија дека неетички е во услови на елементарна непогода, ВМРО-ДПМНЕ да обвинуваат за неспособност.
„Јавноста треба да знае дека поради немање на доволни количини на јаглен уште од 18 јули 2020 година РЕК Битола работи само со еден блок, а според плановите од 15 јули требаше да работат сите три блока. Најголемиот багер за ископ на јаглен повеќе од еден месец е надвор од функција бидејќи е потопен и заглавен во кал, уште пред да се случат вчерашните поројни дождови. За сето ова ВМРО-ДПМНЕ неколку пати ја известуваше јавноста во месец април, мај и јуни“,
рече Стевче Антовски од ВМРО-ДПМНе на денешната прес-конференција.
Според него, квалитет на јагленот е лош и затоа се трошеле огромни количини на мазут, со што се зголемувале и трошоците за производство на електрична енергија, а со тоа е загрозен енергетскиот систем.
„Наместо санирање на ваквите состојби ЕЛЕМ и РЕК Битола набавуваат минерална вода во износ од 3 милиони денари, за потоа без срам да бараат и поскапување на струјата во износ од 7,5%. Додека Власта на Заев е заинтересирана повеќе за тоа како да направи некој милионски скандалозен тендер, како непотистички да ги полни енергетските компании со скапо платени вработувања, како да набавува вода наместо механизација, до тогаш ќе ни се случуваат поскапувања на струјата и хаварии во нашите енергетски компании’,
вели Антовски.
Во услови на елементарна непогода во рудниците, велат од РЕК Битола, неетички и нечовечно е да се зборува за неспособност на комбинатот особено кога вработените вложуваат максимални напори да ги санираат состојбите и дури ги загрозуваат и сопствените животи.
„Во истиот момент кога РЕК Битола и вработените покажуваат највисока пожртвуваност за санирање на состојбата во услови на огромни дотеци на вода и поплави на откопните полиња на јаглен, опозициската партија пласира лажни вести дека ‘непотребно се трошат пари за вода од страна на РЕК Битола’. Ја известуваме јавноста, а ВМРО ДПМНЕ ја потсетуваме, дека водата која во моментот се набавува е за вработените во РЕК Битола, особено за вработените во рудниците каде нема водовод и снабдување со вода за пиење“,
велат од РЕК Битола.
Додаваат дека набавката за вода за рудниците е законска обврска за компанијата и таа е содржана и во Колективниот договор, потсетуваат дека истата е вршена редовно сите години наназад, а вршена е и во времето на Христијан Мицкоски како директор на ЕЛЕМ.
„Оттука, нехумани се прес конференциите кои лица од ВМРО ДПМНЕ ги одржуваат веројатно токму по налог на Мицкоски. Го покануваме партискиот претседател Мицкоски и лицата кои ги иснесуваат лажните вести да дојдат во рудниците на РЕК Битола и да ја видат актуелната состојба на елементарна непогода, и во таа прилика да се сретнат со рударите и со сите вработени и лично да им кажат дека нема потреба да им се дава вода за пие“,
се вели во реакцијата на РЕК Битола.