Според Кузеска, со Фондот за здравство ќе раководи Сашо Клековски, „кој, иако е лекар, никогаш не работел во здравството“, а на директорското место во Управата за извршување санкции е назначен Александар Пандов, „кој е дипломиран историчар и нема соодветно образование и искуство во областа“
ВМРО-ДПМНЕ ја партизира државата со враќање стари кадри, оценуваат од СДСМ. Портпаролката на партијата Богданка Кузеска, денеска на прес-конференција рече дека, доколку се анализираат кадровските решенија што во првата фаза ги назначила Владата, „очигледно е дека Христијан Мицкоски посегнува по стари кадри“.
„Наместо професионализација и промени коишто се ветуваа, гледаме партизација пред квалификација“,
рече Кузеска, додавајќи дека нема нови кадри или некорумпирани професионалци.
Со назначувањето на в.д. директори, како што истакна таа, Владата ја заобиколува неопходната процедура за избор на директори.
Според Кузеска, со Фондот за здравство ќе раководи Сашо Клековски, „кој, иако е лекар, никогаш не работел во здравството“, а на директорското место во Управата за извршување санкции е назначен Александар Пандов, „кој е дипломиран историчар и нема соодветно образование и искуство во областа“.
„Назначувањето на Коце Трајановски за в.д директор е директна потврда дека кадровските политики значат враќање назад кон претходното владеење на ВМРО-ДПМНЕ. ВМРО-ДПМНЕ го враќа градоначалникот кој го спроведе најголемиот градежен криминал во историјата на земјата, проектот ‘Скопје 2014’. Му се даваат 600 милиони евра во рацете и моќ да раководи со најголемите инфраструктурни и градежни проекти. Иако, во исто време, Коце Трајановски е косопственик и управител на фирма чија дејност опфаќа и градежништво“,
истакна Кузеска.
Од ВМРО-ДПМНЕ реагираа дека СДСМ треба да се занимава со тоа дали на следните избори ќе освои пратеничко место, а не да коментираат работи кои имале време да ги анализираат седум години.
„Партијата на гробарите на Македонија, тандемот и браќата по корупција Зоран Заев и Венко Филипче наместо да се сокрие, некако крева галама за нешто што е одмината работа и кое имаа седум години време да го анализираат како власт. Ако мислат дека сè уште им проаѓаат таквите трикови и дека народот ги заборави кои се, се излажале. Тоа се истите кои: бараа провизија на вакцини; крадеа на цитостатици; испумпуваа милиони од РЕК; кои наместо цврста градба градеа модуларни болници, од кои една се запали и изгоре и во смрт однесе 14 луѓе кои живи изгореа; седум години не направија километар пат; го зголемија долгот на државата скоро двојно, а ништо не направија како проект или дело. Списокот е долг, а причините поради кои СДС е тешка опозиција им се јасни во таа партија, а особено на Филипче“,
соопштија од ВМРО-ДПМНЕ.