По целото фијаско што ѝ се случува на оваа власт на ДУИ и СДС мораат на некој начин да го дефокусираат народот и затоа селективно избираат инциденти кои ги форсираат, реагираат од ВМРО-ДПМНЕ
Јавноста можеше да види дека МВР/СДС е претворена во институција која мижи пред криминалот и која дозволува корупцијата вртоглаво да расте со што се овозможи на подземјето да царува со државата, велат од партијата ВМРО-ДПМНЕ во соопштение како реакција на изјавата на портпаролот на СДСМ, Дарко Каевски, кој кажа дека по приведувањето на Ивица Б. кој бил дел од тимот обезбедување на лидерот на ВМРО-ДПМНЕ, Христијан Мицкоски, кажа дека со овој пример, опозициската партија секојдневно го покажува своето вистинско насилничко и криминално лице.
„Наместо како сервис на граѓаните, тие дозволуваат нарко бандите слободно да си го шират бизнисот, да се пресметуваат среде бел ден во центарот на градот, да се случуваат мафијашки ликвидации во локали, најголеми белосветски криминалци да добиваат македонски пасоши, а во исто време своите граѓани да не можат лична исправа да си извадат“,
се вели во реакцијата на ВМРО-ДПМНЕ.
Дополнително, се вели дека фијаското кое и се случува на владејачката двојка ДУИ и СДСМ мора да се дефокусира и затоа само селективно бираат инциденти кои ги форсираат за медиумите. Велат, кога веќе од СДСМ зборуваат за владеењето на правото, тогаш треба да одговорат зошто се уште не се расветлени пресметките и убиствата на „нарко-клановите“, зошто нема разрешница за случајот со петардите на Дрин Ахмети, како и низа други криминални активности.
„Зошто нема ништо за кражбата на оружје од депото на МВР во Охрид, луксузното патување на заменик министерот Буши, кражбите на марихуана, пукањата од калашников на полициски командир на прослави, зошто нема разрешница на тепањето на Бислимовски од страна на синот на Муса Џафери и десетици други случаи кои МВР на СДС и Спасовски ги премолче, што заради неспособност, што свесно заради измеќарењето кон ДУИ“,
велат од ВМРО-ДПМНЕ.
Оттаму, посочуваат дека ваков сличен настан како денешниот се случил и во 2016 година, кога лице од најблиското обезбедување на Зоран Заев претепа десет лица од кои дел и малолетници и истиот случај МВР не го заведе ниту во билтен иако бил уредно пријавен, а за разлика од тој случај, за синоќешниот во кој учество зема еден од припадниците на обезбедувањето на Мицкоски, ВМРО-ДПМНЕ реагираше и побара бескомпромисна реакција на институциите за спроведување на законот, без разлика што станува збор за човек кој се поврзува со таа партија.
Веќе известивме за Ивица Б., полициски службеник и член на обезбедувањето на лидерот на ВМРО-ДПМНЕ, Христијан Мицкоски, синоќа се обидел да спречи полициска акција во познат скопски локал, по што е приведен.
„Откако Ивица упатил заканувачки зборови кон В. Г., го фатил за раката и заедно со неколку НН лица го истуркал надвор од угостителскиот објект, каде што биле други полициски службеници. И покрај предупредувањата од В. Г. дека напаѓаат полициски службеник кој е на должност, Ивица Б. му задал удар со тупаница во пределот на главата. Ивица бил лишен од слобода. За настанот е известен Одделот за внатрешна контрола, криминалистички истраги и професионални стандарди“,
пишува во белешката од инцидентот.
Од ВМРО-ДПМНЕ велат дека од она што им е познато станува збор за лична нетрпеливост меѓу двајцата полициски службеници. Од опозициската партија соопштија и дека Ивица Б. ќе биде отстранет од обезбедувањето на лидерот Мицкоски, а побараа и органите без задршка да ги преземат сите потребни мерки за расветлување на настанот и најостро да казнат секаков вид насилство постапувајќи во согласност со законот.
Прв за настанот утрово преку социјалните мрежи извести дополнителниот заменик-министер за внатрешни работи Митко Бојмацалиев, кој е од редовите на СДСМ, оценувајќи дека македонската историја не памети ваков случај на поранешен полициски функционер (командант на единицата ‘Тигар’, н.з.) да нападне и да спречи свој колега во извршување службена дејност.
Осуда за инцидентот стигна и од министерот за внатрешни работи во техничката влада Панче Тошковски, кој е кадар на ВМРО-ДПМНЕ. Во објава на Фејсбук, Тошковски вели дека е известен надлежен јавен обвинител по чии насоки се постапува. Тој од службите во МВР побарал „максимално професионално и согласно стандардните оперативни процедури да се постапи, со цел во најбрз можен рок да се расчисти овој случај“.