Генералниот секретар на НАТО, Јенс Столтенберг, за Асошиејтед прес изјави дека воената алијанса не планира да испрати борбени трупи во Украина, туку се работи на обезбедување друга воена поддршка за Украина
Кремљ предупредува дека конфликтот меѓу Русија и воената алијанса НАТО предводена од САД ќе стане неизбежен доколку европските членки на НАТО испратат војници да се борат во Украина, пренесува Ројтерс.
Портпаролот на Кремљ, Дмитриј Песков, рече дека доколку предлогот на Макрон се реализира ќе биде можен и директен конфликт со НАТО.
Францускиот претседател Емануел Макрон вчера, истакнувајќи го својот став, ја отвори вратата со цел европските нации да можат да испраќаат војници во Украина. Сепак, тој предупреди дека за таков чекор сè уште нема консензус, барем не во оваа фаза, бидејќи сојузниците се согласиле да ги зголемат напорите за испорака на повеќе муниција во Киев.
„Самиот факт на дискусија за можноста за испраќање одредени контингенти во Украина од земјите на НАТО е многу важен нов елемент“,
изјави Песков.
На прашање кои би биле ризиците од директен конфликт Русија и НАТО, доколку неговите членки испратат свои војници да се борат во Украина, Песков рече дека во тој случај треба да се зборува за неизбежен директен конфликт.
„Во тој случај, не треба да зборуваме за веројатноста, туку за неизбежноста на директен конфликт“,
рече тој.
Советникот на Макрон пред состанокот рече дека консултациите во Париз се повеќе за зголемување на ефикасноста на веќе ветената воена помош, вклучувајќи обука на украински војници и сајбер одбрана.
Шведска, Полска и Чешка се дистанцираа од предлогот на Макрон.
Високиот украински функционер и советник на украинскиот претседател Михаило Подољак ги поздрави разговорите за европските земји кои разговарале за евентуално испраќање на војници во Украина.
„Ова покажува апсолутна свест за ризиците што ѝ ги носи на Европа во милитаристичка и агресивна Русија“,
вели Подољак.
Украинските сили, пак, известуваат за недостиг на оружје и муниција посочувајќи дека недостигот на оружје отстапува место за руските придобивки.
Генералниот секретар на НАТО, Јенс Столтенберг, за Асошиејтед прес изјави дека воената алијанса не планира да испрати борбени трупи во Украина.
Според него, сојузниците на НАТО обезбедуваат голема поддршка на Украина.
„Тоа го направивме од 2014 година, а поддршката ја засиливме по целосната инвазија. Но, нема планови за борбени трупи на НАТО на теренот во Украина“,
рече Столтенберг.
Словачкиот премиер Роберт Фицо рече дека некои земји размислуваат дали да склучат билатерални договори за испраќање војници во Украина за да ѝ помогнат да се избори од целосната руска инвазија.
Но, посочи дека неговата влада не планира да предложи испраќање словачки војници.