Веста дека од Србија ќе добиеме 8 000 вакцини, вчера ја сподели премиерот Зоран Заев, кој рече дека Вучиќ одговорил на нашите барања за првична помош. Вакцините, рече премиерот, ќе ги платиме по набавна цена односно за истата сума за која српските власти ги купиле од „Фајзер“
Претседателот на Србија, Александар Вучиќ, денеска го коментираше тоа што неговата земја ќе отстапи 8 000 вакцини од „Фајзер“ за Северна Македонија, велејќи дека тоа е братски и пријателски потег.
Вучиќ смета дека тоа покажува одговорност од Србија, а наведува и дека тоа се должи и на снаодливоста на премиерот Зоран Заев.
„Што би ни значело нас да бидеме сите здрави ако луѓето во соседството имаат безброј проблеми. Ние можеме да бидеме среќни, само ако и соседите се среќни и задоволни. Кога треба да им помогнеме? Кога е лесно? Веројатно треба да помогнете некому кога е тешко. Колку можеме ќе помогнеме. Тука е, да бидам искрен, и снаодливоста на премиерот Заев кој бараше и се бореше да обезбеди нешто за својата земја. Јас мислам дека тоа не е само пријателски и пријателски и братски потег кон народот во Северна Македонија, ова ја покажува и нашата одговорност и дека добро разбираме дека не живееме во затворен сад, туку дека мора да размислуваме и за нашите соседи, како што сум сигурен дека и тие нас би ни помогнале“,
изјави Вучиќ.
Тој вели дека Србија би дала вакцини и на Албанија, како и дека тоа ќе го стори ако побараат и Република Српска и Босна и Херцеговина.
Веста дека од Србија ќе добиеме 8 000 вакцини, вчера ја сподели премиерот Зоран Заев, кој рече дека Вучиќ одговорил на нашите барања за првична помош. Вакцините, рече премиерот, ќе ги платиме по набавна цена односно за истата сума за која српските власти ги купиле од „Фајзер“.
Инаку, Вучиќ, утрово на седница на државниот врв и Оперативниот штаб за вакцинација на Србија, заедно со премиерката Ана Брнабиќ го најавија и објаснија почнувањето на масовната имунизација во Србија.
Српскиот претседател кажа дека во Србија денеска ќе почне вакцинацијата со кинеската вакцина, како и дека оваа недела ќе пристигнат 250 000 вакцини „Спутник V“ од Русија и оти се очекува наскоро преку Полска да се набави и четвртата вакцина од производителот „Астра-Зенека“.
„Вакцинацијата е од големо значење за Србија, без вакцинација никогаш нема да ја победиме короната, не само во здравствена туку и во економска смисла, ќе дојдеме до работ на бездната“,
кажа Вучиќ.
Премиерката на Србија, Ана Брнабиќ, изјави дека Србија досега набавила 1 054 950 вакцини и дека државата има потпишано договор и платила за повеќе од шест милиони дози.
Таа на состанокот на државниот врв и Оперативниот тим за вакцинација кажа дека новиот систем за следење на вакцинацијата овозможува да се следи се – од моментот кога вакцината ќе пристигне до моментот кога секој граѓанин ќе се вакцинира.
Масовната вакцинација започнува денеска и се отвора голем пункт на Белградскиот саем, а прво ќе бидат вакцинирани припадниците на Министерството за внатрешни работи, војската на Србија и другите безбедносни служби.
На седницата беше најавено дека масовната имунизација почнува и во другите големи градови во Србија, во Нови Сад, Ниш, Крагуевац, Лесковац, Суботица и Крушевац.