Со никој не сме во конфликт, но дали сакате некој да ни ја шпионира војската, некој да влегува во секој хангар на територијата на централна Србија и да брои колку куршуми и гранати имаме, рече денеска српскиот претседател
Србија со никој не се конфронтира, но не може да дозволи некој да ги шпионира нејзините воени сили, порача денеска српскиот претседател Александар Вучиќ откако вчера војската соопшти дека соборила комерцијален дрон во близина на воени објекти во областа Рашка.
Вучиќ вели дека не е првпат да забележуваат беспилотни летала над касарни на српската војска.
„Ги забележавме и деновите претходно и ги предупредивме. Таков вид извидување и недозволени разузнавачки работи претставуваат своевиден вид агресија врз суверена земја“,
изјави денеска Вучиќ на настан на кој се одржа демонстрација на воена вежба на српските вооружени сили.
По повод инцидентот, тој оцени и дека тоа се „заедничка активноста против Србија“.
„Не би ја нарекол непријателска поради различните конотации во кои може да се појават политички актери во земјава и регионот кои од една страна ќе почнат да се потсмеваат зошто некој би користел дронови кога има сателити, а од друга страна ќе прашуваат со кого сме во конфликт. Со никој не сме во конфликт, но дали сакате некој да ни ја шпионира војската, некој да влегува во секој хангар на територијата на централна Србија и да брои колку куршуми и гранати имаме“,
рече Вучиќ.
Вчера и српскиот министер за одбрана Милош Вучевиќ рече дека беспилотни летала биле забележани над територијата на централна Србија и во изјава за РТС кажа дека не може да каже чии се дроновите, но тврди дека доаѓаат од територијата на Косово.