Претседателот на Србија, Александар Вучиќ при денешната посета во Рашка изјави дека Белград ќе се обиде да го зачува мирот, порачувајќи им на Србите од Косово да го заштитат својот народ и дека ќе бидат со нив доколку избие насилство, пренесува Н1.
„Само имајте ја предвид цената што сите ќе треба да ја платиме, и зошто моето барање е да се обидеме да го избегнеме тоа“,
рече Вучиќ по состанокот со претставниците на Српската листа и граѓани од Косово.
Тензиите во северниот дел на Косово започнаа откако утрово косовската полиција спроведувала, како што тврди, акција против шверцери на стоки. Припадниците на косовската полиција, според информациите, упаднале во една од градските аптеки каде што ги проверувале царинските документи.
Потоа граѓаните се собрале на протест, изразувајќи незадоволство од акцијата, а ситуацијата ескалирала кога косовската полиција почнала да фрла шок-бомби и солзавец.
Во соопштението што го издаде полицијата на Косово се наведува дека акција спроведуваат во регионот на Приштина, Пеќ, Јужна и Северна Митровица. Директорот на Клиничкиот болнички центар Косовска Митровица, Златан Елек, за Н1 изјави дека 10 лица се повредени, еден маж е тешко повреден.
Вучиќ рече дека според разузнавањето на Србија, Приштина имала поддршка од „барем една држава“ која не е членка на ЕУ. Пред средбата со претставниците на Србите од северот на Косово, Вучиќ рече дека контактирал со специјалниот претставник на ЕУ, Мирослав Лајчак, и од него побарал да ја зауздаат Приштина.
„Ми рекоа – работиме на тоа“,
наведе Вучиќ.
Тој им порача на Србите дека „Белград ќе биде со нив“ и да бидат рационални во своите одлуки.
По посетата во Рашка, Вучиќ придружуван од министерот за внатрешни работи, Александар Вулин и командирот Дејан Луковиќ ја посети и полициската база во Краљево и на припадниците на оваа формација им порача да бидат подготвени.
„Ќе дадеме се од себе за да не бидете во таква ситуација, но доколку државата ве повика да го заштитиме нашиот народ, јас знам дека вие ќе ја извршите вашата должност на најчесниот начин“,
рече Вучиќ.
Тој кажа дека ќе се обидат да го зачуваат мирот речиси „по секоја цена“, но доколку треба ќе реагираат за заштита на народот.