Втор ден од НАТО-самитот во Вашингтон

И покрај очекувањата за потенцијална средба на македонскиот и грчкиот премиер Христијан Мицкоски и Киријакос Мицотакис на маргините на самитот, таа е сè понеизвесна

Во Вашингтон денеска продолжува НАТО-самитот кој се одржува по повод 75-годишнината од формирањето на Алијансата. На вчерашното отворање на настанот се обрати американскиот претседател Џо Бајден кој, посакувајќи им добредојде на лидерите на земјите членки на Алијансата, порача оти Алијансата е посилна од кога било.

Во фокусот на годинашниот НАТО-самит се обезбедување сигурна и стабилна поддршка за Украина, плановите за одвраќање и одбрана на членките на Пактот, зајакнување на одбранбената индустрија и инвестициите и зацврстување на глобалните партнерства.

Генералниот секретар на НАТО во заминување, Јенс Столтенберг, изрази очекување оти на самитот ќе се донесат важни одлуки за Алијансата, но и за натамошното зајакнување на помошта за Украина.

• Бајден: НАТО е помоќна од кога било

На настанот учествува и македонска делегација предводена од премиерот Христијан Мицкоски, а во состав на министрите за надворешни работи и надворешна трговија, одбрана и внатрешни работи – Тимчо Муцунски, Владо Мисајловски и Панче Тошковски. Во Вашингтон е и претседателот на Собранието, Африм Гаши, кој во пресрет на отворањето на самитот учествуваше на Парламентарниот самит на НАТО.

И покрај очекувањата за потенцијална средба на македонскиот и грчкиот премиер Христијан Мицкоски и Киријакос Мицотакис на маргините на самитот, таа е сè понеизвесна. Портпаролот на грчката влада Павлос Маринакис пред два дена изјави дека не е предвидена, но е можна средба меѓу Мицкоски и Мицотакис.

• Не е предвидена, но е можна средба меѓу Мицкоски и Мицотакис на маргините на самитот на НАТО во Вашингтон, вели портпаролот на грчката влада

Во рамки на посетата на Вашингтон, Мицотакис вчера учествуваше на јавна дебата со поранешниот амбасадор на САД во Грција, Даниел Спекхард, рече дека е сериозно загрижен што новата влада на Северна Македонија во внатрешната комуникација сè уште се нарекува Република Македонија. Членството на С Македонија во НАТО, порачал Мицотакис, е поради тоа што Атина го тргна ветото по потпишувањето на Договорот од Преспа.

• Мицотакис: Основно во Договорот од Преспа е дека името Северна Македонија мора да се користи и внатре и надвор