Се работи за брачен пар – сестра и зет на судија на Врховниот суд, кои не се брачниот пар дојден од Бугарија и кои иако покажувале симптоми на настинка не биле тестирани на коронавирус се до вчера, кога е констатирано дека се позитивни, велат од Врховен
По веста на „360 степени“: Вонредна состојба во Врховен: Сестра на судијка заразена од коронавирус, во која објавивме дека дел од вработените во судот не одат на работа откако се дознало дека една од новозаразените со короновирус (брачен пар кој неоадамна се вратил од Бугарија) е сестра на врховна судијка, Врховниот суд испрати допис насловен „Реакција и барање за објава за демант“. Во документот се обзнанува дека има врховна судијка во самоизолација, но судот УКАЖУВА дека не станува збор за брачниот пар заразен со коронавирус кој бил во Бугарија, туку за друга брачна двојка.
Дописот го пренесуваме во целост, без јазични интервенции:
„Во врска со насловот „Вонредна состојба во Врховен: Сестра на судијка заразена со коронавирус“ на 18.03.2020 година на www.360stepeni.mk, во услови на вонредна состојба во државата која се соочува со сериозна криза во најмала рака неодговорно е и неоправдано да се пласираат непроверени информации воопшто и за највисокиот суд во државата, особено кога се работи за информации од поширок јавен интерес бидејќи истото не доведува до вистинито, правилно и сестрано информирање на граѓаните. Од тие причини заради одговорно и целосно информирање на јавноста, бидејќи во текстот се содржани одредени непотврдени информации кои создаваат забуна ВИ УКАЖУВАМЕ дека се работи за брачен пар – сестра и зет на судија на Врховниот суд на Република Северна Македонија, но кои не се брачниот пар дојден од Бугарија и истите не се дојдени од странство кои иако покажувале симптоми на настинка не биле тестирани на коронавирус и таков тест им е направен дури на 17.03.2020 година, кога е констатирано дека се позитивни. Судијата на Врховниот суд на Република Северна Македонија последен контакт со својата сестра имала на 06.03.2020 година, кога кај нив не постоеле симптоми на болеста. Со оглед дека од последниот контакт на судијата на Врховниот суд на Република Северна Македонија до денес се изминати 12 дена и како истата нема никакви симптоми, сепак судијата до крајот на неделава ќе остане во самоизолација. Воедно, Ве известуваме дека судијата е во комуникација со Центарот за јавно здравје и одговорено и е дека нема потреба да биде подложена на тестирање“,
велат од Врховниот суд.
По оваа реакција, „360 степени“ официјално упати неколку прашања до Врховниот суд, кој денеска требаше да одржи Општа седница: дали седницата се одржала, колку судии биле присутни и кои одлуки се донесени. Очекуваме одговор.