Орденот на принцезата Олга од прв степен, кој ѝ беше врачен денеска во Киев, на Славјанка Петровска ѝ беше доделен од украинскиот претседател Володимир Зеленски во 2023 година, за нејзиниот личен придонес во зајакнувањето на одбранбените капацитети на Украина во текот мандатот како министерка за одбрана на Северна Македонија
Поранешната министерка за одбрана и актуелна пратеничка во Собранието, Славјанка Петровска, денеска во Киев беше одликувана со Орденот на принцезата Олга од прв степен. Признанието ѝ е доделено од украинскиот претседател Володимир Зеленски во 2023 година за нејзиниот личен придонес во зајакнувањето на одбранбените капацитети на Украина во текот мандатот како министерка за одбрана на Северна Македонија.
Орденот ѝ го врачи Игор Жовква, заменик-шеф на Кабинетот на претседателот на Украина.
Петровска му заблагодари на украинскиот претседател за одликувањето и порача дека Украина и Украинците можат и натаму да сметаат на нејзината принципиелна поддршка.
„Ова признание не го доживувам само како лично. Тоа е признание и за нашата држава, за професионалците во одбраната и за одлуките со кои Македонија покажа дека е принципиелен и кредибилен сојузник. Кога Украина беше нападната, не избравме молк. Застанавме на страната на меѓународното право, суверенитетот и правото на секоја држава да ја брани својата слобода. Кога го браниме правото на Украина на слобода и суверенитет, го браниме истиот меѓународен поредок што ги заштитува и малите држави како нашата“,
порача Петровска во објава на Фејсбук.
Покрај доделувањето на признанието, Петровска и Жовква разговарале и за актуелните потреби на Украина. Заменик-шефот на кабинетот на украинскиот претседател во оваа смисла изразил очекување дека Македонија ќе продолжи со поддршката за Украина и преку билатерални механизми и во рамките на меѓународните иницијативи.
„Ја цениме поддршката на Северна Македонија за формирање на Специјален трибунал за агресија против Украина и меѓународните напори за компензација на загубите предизвикани од Русија и со нетрпение очекуваме ратификација на релевантните меѓународни конвенции од страна на парламентот“,
порачал претставникот на кабинетот на Зеленски за време на средбата со Петровска.
Жовква го актуализирал и прашањето за признавање на Холодоморот од страна на македонскиот парламент како геноцид врз украинскиот народ, оценувајќи го ваквиот потег како важен чекор кон враќање на историската правда. Се заблагодарил за досегашната поддршка на земјава во борбата на Украина против руската агресија.