Заокружувајќи го своето обраќање на свеченоста по повод одбележувањето на 7 Мај, Мицкоски за безбедноста рече дека таа не е само статистика, туку чувство, и ја спореди со родител кој без страв го пушта своето дете во училиште и кога една мајка спокојно се враќа дома во доцните часови
Нема компромис со криминалот. Ова е главната порака што денеска ја упати премиерот Христијан Мицкоски во своето обраќање на свеченоста по повод прославата на Денот на полицијата – 7 Мај.
На настанот, кој се одржа во Центарот за обука на Министерството за внатрешни работи (МВР) во Идризово, присуствуваа повеќе гости, меѓу кои и државниот јавен обвинител Љупчо Коцевски, пред кои премиерот истакна дека корупцијата и организираниот криминал немаат место во државата која сака да оди напред.
„Одлучни сме, како Влада, како институции, но пред сè како општество – дека оваа борба мора да се води со целосна посветеност, со вистински партнери и со чисти раце“,
рече Мицкоски.
Задржувајќи се на таа линија, тој рече дека во оваа држава нема веќе место за врски, непотизам и заштита од одговорност и дека законот важи за сите, без разлика дали се работи за обичен граѓанин, функционер или бизнисмен.
Рече и дека силата на државата не се мери со привилегиите на поединците, туку со тоа дали правдата стигнува до сите – и до најмоќните, и до најмаргинализираните.
„’Правдата може да биде бавна, но никогаш не треба да биде слепа’, велат. Наша задача е да и ги отвориме очите – преку професионална, етичка и непоткуплива полиција. Полиција која ќе го гони криминалот, без оглед на тоа дали стои зад маска, позиција или пари. И токму затоа, инвестираме и ќе продолжиме да инвестираме во вас – нашите полициски сили. Ќе вложуваме во технологија, опрема, обука, но и во достоинството што ви припаѓа. Вашата мисија е света – да чувате поредок, но и да вратите доверба кај народот. ‘Кога правдата замолчува, неправдата станува гласна’, рекол еден мудар човек. Но со вас – со вашата работа, посветеност и пожртвуваност – неправдата останува без простор. Таа се повлекува пред чесната, решителна и модерна полиција“,
рече премиерот.
Како увертира во овие свои пораки, Мицкоски се осврна на времето на минатата власт кога, како што кажа, криминалците слободно се шетале, државата молчела, а граѓаните живееле со чувство на немоќ.
„Имаше време кога институциите се користеа како алатка за лични и политички интереси, а не за правда. Пораките ‘ќе средиме’ и ‘ќе се јавам’ беа погласни од законот. Но тоа време е завршено“,
рече тој.
Говорејќи за полицијата, премиерот рече дека таа не е само униформа и службена должност, туку човек, кој станува порано од сите, излегува на терен и се соочува со ризици од кои сите ние се обидуваме да се заштитиме.
„Тој човек, полицаецот, не размислува само за својата безбедност, туку и за нашата. ‘Храброста не е отсуство на страв, туку победа над него’, рекол Нелсон Мандела. А храброста на нашите полицајци се покажува секој ден, во секоја интервенција, во секоја патрола, во секоја жртва дадена за да останеме сигурни. Не можеме, а да не се поклониме пред споменот на оние кои својата работа ја запечатија со животот. Нивните имиња се врежани во историјата, но нивните дела живеат во секој наш безбеден ден“,
кажа премиерот.
Заокружувајќи го своето обраќање, Мицкоски за безбедноста рече дека таа не е само статистика, туку чувство.
„Таа е кога родител без страв го пушта своето дете во училиште. Кога една мајка спокојно се враќа дома во доцните часови. Кога секој граѓанин знае дека државата стои зад него. Тоа чувство ни го подарувате вие, полицајците. Да ви се заблагодариме за секоја ноќ без инцидент, за секој спасен живот, за секој криминалец што одговара за своите дела. Ви посакувам здравје, сила и секогаш – безбеден повраток дома “,
рече премиерот честитајќи го Денот на полицијата.