Северна Македонија е пример каде што мислам дека ЕУ не беше секогаш многу фер, бидејќи побаравме многу различни работи, а вие ги испорачавте. Сега треба да преминеме на следното поглавје, а тоа е отворање на преговорите по поглавја и затворање на овие поглавја откако ќе ги спроведете уставните измени на кои се обврзавте, вели потпретседателот на Европската комисија
Северна Македонија, како и сите земји од регионот, се цврсто на патот кон ЕУ. Процесот на европеизација на Балканот е неповратен. Сега е моментот кога регионот треба да биде европеизиран, наместо ЕУ да биде балканизирана, како што многупати се случувало во минатото, вели потпретседателот на Европската комисија Маргаритис Схинас во изјава за МИА.
Според Схинас, повеќето земји се сега цврсто на патот кон членство во ЕУ.
„Северна Македонија е пример каде што мислам дека ЕУ не беше секогаш многу фер, бидејќи побаравме многу различни работи, а вие ги испорачавте. Сега треба да преминеме на следното поглавје, а тоа е отворање на преговорите по поглавја и затворање на овие поглавја откако ќе ги спроведете уставните измени на кои се обврзавте. Значи, сè на сè, позитивен момент за Северна Македонија“,
додава Схинас.
На прашањето да даде појаснување за тоа како би се европеизирал регионот во кој постојат многу отворени билатерални прашања, кои не се според европските стандарди, како спорот меѓу Северна Македонија и Бугарија, Схинас истакна дека доколку се погледне назад во историјата многу пати имало примери на балканизација на европската политика.
„Мојата главна порака беше дека кога ќе погледнеме назад кон историјата, многу пати видовме балканизација на европската политика. Ние знаеме што значи тоа – страдања, војни, поделби. Но, она што не сме го виделе досега е европеизација на регионот на Балканот. И тоа се случува сега, само во изминативе 20 години, тоа е ново и е нешто позитивно, тоа е охрабрувачки чекор“,
вели Схинас.
Во однос на тоа дали навистина верува дека регионот ќе биде европеизиран многу брзо, тој вели дека тоа е неповратен процес.
„Цврсто верувам дека ова е неповратен процес, кој нема алтернатива. Поддржан е од општеството и е вин-вин процес, кога во овие геополитички турбулентни времиња станува јасно дека на Европа ѝ е потребен регионот и на регионот му е потребна Европа. Затоа, да, можам да бидам обвинет за оптимизам, но навистина верувам дека процесот е неотповиклив“,
уверува Схинас.