Доколку не земат плата, тие најавуваат и протест пред Владата, кој според најавите треба да се одржи идната сабота на 29 октомври. Целта е вработените да се изборат за земање на задоцнетата плата
Исплата на платите за септември или прекин на работата, бараат вработените во „Пошта на Северна Македонија“. Тие од денеска започнуваат со предупредувачки прекини во работата во времетраење од половина час.
Вработените во Пошта велат дека предупредувачките прекини ќе се одвиваат за време на паузата во времетраење од половина час, со цел корисниците на нивните услуги да не бидат оштетени.
Претседателот на Синдикатот на Пошта, Боро Велигденов, во изјава за МИА кажа дека протестите ќе се одвиваат во сите подружници на поштата ширум земјава и најави дека освен денеска, протестите ќе продолжат и во наредните денови.
„Предупредувачките протести ќе продолжат и во наредните денови сè додека не издејствуваме исплата на платата“,
изјави Велигденов.
Тој вели дека имале средба со раководството на „Пошта“ кое ги информирало оти прави напори да обезбеди финансии и дека се чека поддршка од Владата.
Доколку не земат плата, вработените најавуваат протест пред Владата, кој според најавите треба да се одржи идната сабота на 29 октомври. Целта е тие да се изборат за земање на задоцнетата плата.
Вработените од националната пошта во април годинава стапија во генерален штрајк барајќи линеарно покачување на нето-платите во износ од 3 000 денари.