Од Синдикатот на Филхармонија побараа одговор од Министерство за култура дали е најден нов простор на Џез-оркестарот
Вработените во Македонска филхармонија денеска пред зградата на Владата излегоа на протест поради одлуката новоформираниот Џез-оркестар просторно да биде сместен во објектот на оваа институција. Претседателот на Синдикатот на Филхармонијата, Владимир Лазаревски, на протестот изјави дека оваа одлука уште не е променета и иако побарале прием кај премиерот сè уште не добиле никаков одговор.
„Минатата недела вработените и дадоа црвен картон на министерката за култура. Денеска сме пред Владата, бидејќи уште пред неколку недели побаравме прием кај премиерот, но, за жал, не добивме никаков одговор, ниту пак се заложија за промена на одлуката. Денеска во интервју претседателката на Синдикатот за култура, Верче Атанасовска вели дека е информирана од министерката за култура дека е најден соодветен простор каде што ќе биде сместена новоформираната институција“,
посочи Лазаревски.
Тој ја повика министерката за култура Бисера Костадиновска-Стојчевска да информира дали е најден нов простор на Џез-оркестарот.
„Ние и денеска протестираме бидејќи досега од Министерството не сме добиле ниту соопштение, ниту сме информирани дека е најдено просторно решение. Недостатокот на комуникација и заеднички јазик беа главна причина за создавање на проблемот уште на самиот почеток, затоа еве, уште еднаш јавно ја повикуваме министерката да излезе со соопштение во јавноста и да не информира, нас, вработените во Филхармонија кои сме директно засегнати од оваа ситуација“,
рече Лазаревски.