Министерот за здравство Венко Филипче на денешната прес-конференцијата информира дека еден од членовите на резервниот тим на Клиниката за кардиологија е позитивен на коронавирус.
Филипче кажа дека тој на работното место пријавил симптоми, по што тестовите се покажале позитивни. Посочи дека тој бил во делот на ангио-салата каде што нема лежечки пациенти, туку доаѓаат за интервенција, а како што рече, лекарите во тој дел од контактот се целосно заштитени.
Поради тоа, засега нема да има промени во работата на оваа Клиника.
Како што претходно објави „360 степени“, повикувајќи се на медицинските власти, станува збор за рендген-техничар, кој, иако требало да биде во самоизолација, се појавил на работа на Клиниката, со видливи симптоми.
Тоа го вклучило алармот на Клиниката за да се тестира целиот медицински тим од доктори и сестри што бил во контакт со него. Се чекаат резултатите, но тие во оваа фаза може да бидат лажно негативни, така што првиот ред контакти со заразениот најверојатно ќе треба да останат во двонеделна изолација.
Салата и просториите во кои работел инфицираниот техничар се дезинфицирани.
Сепак, министерот кажа дека ќе се направи проверка, и доколку се утврди дека некој свесен со симптоми на вирусот се појавил на работа, ќе следуваат санкции.
Во врска со случајот со тетовецот кој е заболен со ковид-19, а престојувал во Заводот за рехабилитација во Козле, рече дека сè уште траат испитувањата, анализата и анкетите, земени се материјали од уште 18 вработени и, откако ќе бидат готови, ќе се направи план за работа на оваа институција. Најверојатно, како што рече Филипче, ќе работи само амбулантскиот дел.
Во однос на вкупната бројка на досега заразени здравствени работници, Филипче рече дека до вчера тој број е 17, и голем дел од нив не биле свесни дека имале контакти со заболен од ковид-19.