Велешанецот на денот на сообраќајна несреќа го управувал своето возило под дејство на алкохол, возел со брзина над дозволената и не ги почитувал сообраќајните знаци. Откако ги удрил мајката и ќерката, наместо да застане и да им помогне, тој избегал од местото на несреќата
Трагичната сообраќајна несреќа, во која загина 11-годишно девојче, а тешко повредена беше и нејзината мајка, се случи на 17 декември минатата година на улицата „Борис Трајковски“ во Велес, кога преминувајќи ја улицата беа удрени од автомобил
Основното јавно обвинителство (ОЈО) Велес поднесе обвинение против 30-годишниот велешанец што во декември минатата година на пешачки премин со автомобил усмрти 11-годишно девојче, а тешко ја повреди и неговата мајка. Обвинет е за сторено тешко дело против безбедноста на луѓето и имотот во сообраќајот и за неукажување на помош на лице повредено во сообраќајна незгода.
„Обвинителниот акт е поткрепен со изјави на сведоци на настанот, фотодокументација и видеозаписи од камери на неколку околни објекти, како и со повеќе вештачења извршени по наредба на јавниот обвинител“,
велат од велешкото обвинителство.
Во описот што Обвинителството го дава за конкретниот случај, се наведува дека велешанецот на денот на трагичната сообраќајна несреќа го управувал своето возило марка „мерцедес“ под дејство на алкохол, возел со брзина над дозволената и не ги почитувал сообраќајните знаци.
„Возел со брзина од околу 68 километри на час, што е повеќе од двојно над дозволената брзина на критичниот дел од патот, каде што постоел и сообраќаен знак за максимално дозволена брзина од 30 километри на час. Обвинетиот не обрнал внимание на пешаците и со автомобилот удрил во мајка и ќерка, кои во тој момент поминувале преку обележаниот пешачки премин. Од ударот мајката се здобила со телесна повреда на челото. Девојчето, пак, било исфрлено 10-ина метри напред, до следниот пешачки премин, каде што паднало на земја, се здобило со многубројни тешки повреди во пределот на главата и екстремитетите и починало“,
се наведува во соопштението на ОЈО Велес.
Откако ги удрил мајката и ќерката, наместо да застане и да им помогне, велешанецот избегал од местото на несреќата со своето возило. Својот автомобил го оставил на место подалеку од својот дом, го исклучил мобилниот телефон и не бил достапен во наредните два дена, кога потоа се предал во надлежните институции.
„Ова за јавниот обвинител неспорно го потврдува стравот дека доколку се брани од слобода тој би можел повторно да се даде во бегство за да го избегне кривичниот прогон“,
посочуваат од ОЈО Велес.
Дополнително, во соопштението на Обвинителството се додава дека на 30-годишникот и претходно му биле изречени две казни за забрана за управување со моторно возило поради алкохолизираност, кои не ги почитувал. Поради веројатност да го повтори кривичното дело, Обвинителството до Основниот суд во Велес достави и предлог за продолжување на мерката притвор.
Трагичната сообраќајна несреќа, во која загина 11-годишно девојче, а тешко повредена беше и нејзината мајка, се случи на 17 декември минатата година на улицата „Борис Трајковски“ во Велес. Двете ја поминувале улицата на пешачки премин, а пред да се качат на тротоарот биле удрени од возило што се движело со голема брзина. Од ударот девојчето било исфрлено дури до наредниот пешачки премин, а од нанесените повреди починало.