Вкупно 28 патници биле во автобусот со кој на 27 февруари пристигнале заболените пациенти
Возачот на автобусот со кој допатуваа двајцата новозаболени пациенти е негативен на коронавирус, соошти вечерва Министерството за здравство.
Тој денеска со нова тура патници од Италија беше пречекан при влез во земјава на граничниот премин Табановце. Автобусот, како што објаснуваат од Министерството, бил тргнат настрана, а до добивањето на резултатите од тестот, тој и патниците биле во неколкучасовна изолација во објект на Царинската управа на граничниот премин.
До истекот на 14. ден од периодот на инкубација, пресметано од последниот ден на контакт со заболените (27 февруари), возачот, со решение на ДСЗИ, останува во домашна изолација, под здравствен надзор на епидемиолозите.
„Патниците кои денеска пристигнаа со него, по прегледот од епидемиолозите на граничниот премин, при што кај ниту еден не е индицирана болест, се пуштени дома. Тие немале контакт со позитивен пациент, но дадени им се препораки, доколку почуствуваат некои симптоми да не одат по здравствени институции, туку веднаш да се јават во центрите за јавно здравје“,
велат од Министерството за здравство.
Според последната информација добиена од МВР, вкупниот број на патници во автобусот со кој на 27 февруари пристигнале заболените пациенти е 28. Оваа бројка ги вклучува возачот – сега веќе тестиран и негативен, двајцата заболени пациенти и тројца патници кои ја напуштиле земјата. Другите 22 патници, како што велат здравствените власти, се идентификувани и контактирани. Со решение на ДСЗИ за здравствен надзор со полициска придружба сите остануваат во домашна изолација, а за непостапување по решението следуваат правни последици.