Министерот за здравство информира дека возачот на автобусот повторно заминал на тура во Италија и сега е на Табановце, така што ќе бидат преземени превентивни мерки
Двајцата пациенти од Дебар, кај кои вчера беше потврден коронавирусот, се во стабилна здравствена состојба, ама возраста ги катергоризира во ризична група. Тие се префрлени на Инфективната клиника во Скопје, соопшти на денешната прес-конференција министерот за здравство, Венко Филипче.
Тој рече дека најдени се уште девет лица кои биле во контакт со заразените, од нивната околина на живеење. И ним им е определена домашна изолација.
Сите други патници во автобусот се идентификувани и за нив ќе бидат преземени превентивни мерки. Еден од патниците е државјанин на Албанија и за случајот е известено тамошното Министерство за здравство.
Возачот на автобусот, со кој патувале сопружниците од Дебар, во меѓувреме, повторно заминал на тура во Италија. Автобусот сега е на Табановце, ќе биде тргнат настрана и тртманот на патниците ќе зависи од состојбата на возачот.
Филипче апелира до лицата кои патувале надвор од земјава да не ги сокриваат информациите за својата здравствена состојба на граничните премини.
Синоќа, бројката на заразени со новиот вирус во земјава стигна до тројца, откако инфекцијата беше потврдена кај сопружници од Дебар кои се вратиле од Италија.