Министерството за внатрешни работи (МВР) соопшти дека за возачи на товарни моторни возила нема да е потребен негативен ПЦР тест при влез во Република Грција.
Ова е дополување на известувањето од МВР за нов протокол за влез во Грција од граничниот премин „Евзони“ , кој стапува на сила од 17 август (понеделник).
„Ве известуваме дека за влез во Република Грција не e потребен негативен ПЦР тест само за возачи на товарни моторни возила“,
велат од МВР.
Според новиот протокол, на граничниот премин „Евзони“, во периодот од 6 до 22 часот по македонско време, влез во Грција ќе може да остварат само грчки државјани, државјани на трети земји кои имаат регулиран престој во Грција, EULEX-дипломатски персонал и членови од нивните семејства, лица кои патуваат од медицински и бизнис причини, а кои претходно биле најавени и добиле одобрување за патување од Aмбасада на Република Грција во странство, како и возачи на товарни возила.
„Сите овие лица (освен возачите на товарни возила) за да остварат влез во Грција на преминот ‘Евзони’ потребно е да приложат негативен ПЦР тест за ковид-19 од сертифицирана лабораторија на англиски јазик, не постар од 72 часа“,
се наведува во соопштението на МВР и информираат дека останува обврската за претходна електронска најава и добивање на PLF документ (Passenger Locator Form).