Двајцата соизвршители влегле во продавницата, во која во тој момент биле присутни повеќе вработени, возрасни купувачи, но и три деца. На сите им се заканиле со оружјето и експлозивот, а еден од осомничените застанал пред вратата за да ги спречи да излезат. Другиот осомничен влегол зад пултот, од каде што ги одзел парите од касите, па заканувајќи се со оружјето побарал од вработените да му го отворат сефот, од каде одзел црвена метална каса со пари и вредносни ваучери
Основното јавно обвинителство Скопје покрена истрага против две лица на возраст од 21 и 27 години, осомничени за разбојништво, кое се случи во петокот во продавница за бела техника кај Градскиот стадион. Поради опасност од бегство, влијание врз сведоци или повторување на делото, Обвинителството бара притвор за двајцата осомничени.
„На 29 ноември, двајцата осомничени со електрични тротинети дошле до продавницата за бела техника ’Нептун’ кај Градскиот стадион. Биле маскирани со пластични маски, шалови и качулки на главите и вооружени со пиштоли, додека едниот осомничен на себе носел и импровизирана рачно изработена експлозивна направа во форма на динамит. Двајцата соизвршители влегле во продавницата, во која во тој момент биле присутни повеќе вработени, возрасни купувачи, но и три деца. На сите им се заканиле со оружјето и експлозивот, а еден од осомничените застанал пред вратата за да ги спречи да излезат. Другиот осомничен влегол зад пултот, од каде ги одзел парите од касите, па заканувајќи се со оружјето побарал од вработените да му го отворат сефот, од каде одзел црвена метална каса со пари и вредносни ваучери. Со разбојништво и закана по животите на присутните, осомничените одзеле пари во вкупна вредност од 556 146 денари, ги предупредиле присутните да не повикуваат полиција и излегле од продавницата“,
се наведува во соопштението од Обвинителството.
Во непосредна близина пред продавницата ги затекнале полициски службеници кои веднаш на лице место ги лишиле од слобода, додаваат од Обвинителството.
За грабежот во петокот извести и МВР, од каде посочија дека лицата веднаш биле уапсени.
„Полициски службеници од Единицата за интервентна полиција при СВР Скопје вечерва лишија од слобода две лица кои малку пред тоа извршиле разбојништво во продажен објект во Градскиот парк во Скопје. Веднаш по добиената пријава, преземени се соодветни мерки и активности и сторителите се лишени од слобода и во содејство со Основно јавно обвинителство ќе биде поднесена соодветна пријава“,
соопшти МВР.
Дел од медиумите, повикувајќи се на свои извори, објавија дека разбојниците биле маскирани и вооружени со пиштоли. Заканувајќи се, на вработените во продавницата им наредиле да ги испразнат касите со дневниот промет. Како што објави ТВ 21, тие на вработените им се заканиле со зборовите: „Вадете ги парите од касата, ако некој викне полиција, сите ќе ве убиеме“.