Косовските Срби, на повик на најголемата партија на таа заедница во Косово, Српска листа (СЛ), која е отворено поддржана и од официјален Белград, ги напуштија државните и локалните институции, откако косовските власти продолжија со планот за пререгистрација на возилата со регистарски ознаки издадени од Србија
Претседателката на Косово, Вјоса Османи за 18 декември ги закажа вонредните локални избори во општините со мнозинско српско население во северно Косово, во кои градоначалниците и членовите на советите поднесоа оставки на почетокот на месецов, јавуваат локалните агенции.
Одлуката Османи ја објави синоќа по по состанокот со претставници на неколку косовски партии, главно од немнозинските етнички заедници.
Кабинетот на Османи објави дека таа одлучила изборите во општините Северна Митровица, Зубин Поток, Лепосавиќ и Звечане да се одржат на 18 декември.
„Се упатува Централната изборна комисија да ги преземи сите потребни дејствија за организирање и одржување на изборите за градоначалници во Северна Митровица, Зубин Поток, Лепосавиќ и Звечане, согласно оваа одлука и законите кои се на сила“,
се наведува во соопштението од кабинетот на Османи.
Ковоската претседателка најави и дека ќе побара од меѓународните партнери да го набљудуваат гласањето на 18 декември и да бидат што е можно поприсутни на терен во текот на целиот изборен процес.
„Претседателката Османи исто така нагласи дека безбедносните институции ќе ги преземат сите мерки со цел граѓаните, без оглед на нивната припадност, да го остварат своето уставно право“,
се додава во соопштението.
Косовските Срби, на повик на најголемата партија на таа заедница во Косово, Српска листа (СЛ), која е отворено поддржана и од официјален Белград, ги напуштија државните и локалните институции, откако косовските власти продолжија со планот за пререгистрација на возилата со регистарски ознаки издадени од Србија.
Српска листа најави „жесток отпор“ доколку се започне со изрекување парични казни за тие што нема да ги сменат српските таблички со оние со ознака „РСК“ (Република Косово).
Тие враќањето во косовските институции го условија со запирање на планот за пререгистрација на возилата и со формирање на Заедницата на српски општини
На состанок кај Османи, иако беа поканети, не присуствуваа лидерите на парламентарните опозициски партии на косовските Албанци, кои бараат од Курти да го исполни барањето на САД и другите западни сојузници за одлагање на спроведувањето на одлуката за табличките.