Во споредба со март 2019 година, трошоците на животот бележат пораст од 0,5 отсто
Трошоците на животот во март годинава се зголемени за 0,2 отсто во споредба со претходниот месец, а цените на мало, пак, се намалени за истиот процент – 0,2. На годишно ниво, односно во споредба со март 2019 година, трошоците за животот бележат пораст од 0,5 отсто, а цените на мало пораснале за 0,3 проценти.
Според податоците на Државниот завод за статистика, пораст на трошоците на животот во март 2020 година, во споредба со претходниот месец, е забележан кај свежото и разладеното овошје за 7,2 отсто, цигарите за 4,1 проценти, маслото и маснотиите за 3,4, шеќерот, џемот, медот, чоколадата и кондиторските производи за 0,9, јајцата за 0,8, месото и млекото за 0,7. Порастот на трошоците кај лебот и житата, сирењето и урдата, свежиот и разладениот зеленчук освен компирот и другите коренести плодови е за 0,4 отсто, на жестоките пијалаци и виното за 0,3 и на останатите прехранбените производи за 0,2 отсто.
Пораст на трошоците на животот е забележан и кај апарати и производи за лична хигиена за 1,3 отсто, игрите и играчките за 0,9, материјалите за одржување и поправките на живеалиштето, моторните возила за 0,8, градините. Кај растенијата и цвеќињата порастот на трошоците е за 0,6 проценти, за малите електрични апарати за домаќинствата за 0,5, мебелот, покуќнината, фармацевтските производи за 0,4, големите електрични апарати за домаќинствата за 0,3, другите медицински производи, домашните миленици и сродни производи за 0,2 отсто.
Намалување на трошоците на животот има кај рибата и морските плодови, сувото овошје и јаткастите производи за 0,4 отсто, сушениот зеленчук, другиот конзервиран и преработен зеленчук за 0,2 отсто.
Намалување на трошоците на животот е забележано и кај течните горива за домаќинствата за 10,2 отсто, горивата и мазивата за сопствените превозни средства за 7,8, телефонската и телефакс- опремата за 2,9, гасот за домаќинствата за 2,8 проценти. Намалување има и кај воздухопловниот патнички транспорт за 1,8, резервните делови и приборот за сопствените превозни средства за 0,8, опремата за прием, снимање и репродукција на звук и слики за 0,6, информатичката опрема за 0,2, опремата за спорт, кампирање и рекреација на отворено за 0,2 отсто.