Премиерот Јанез Јанша најави дека веќе од вторник ќе почнат со постепено укинување на ограничувањата воведени со цел да се спречи ширењето на коронавирусот
По затворањето на училиштата и градинките во Словенија, голем број деца, пред сè од социјално ранливи семејства, останаа без ниту еден топол оброк во текот на денот, јави дописникот на МИА од Љубљана.
За решавање на овој проблем и за помош на овие деца се пријавија и голем број доброволци, меѓу кои и 200 возачи на градските автобуси во Љубљана. Дневно овие луѓе разнесуваат и до 515 бесплатни топли оброци.
Бесплатен топол оброк добиваат и старите лица кои се сами во своите домови и нема кој да се грижи за нив.
Во словенечкиот главен град се организираше и бесплатно доброволно чување деца. За оваа акција се пријавија 132 воспитувачи и учители, кои ги чуваат дома децата кои немаат кој друг да внимавам на нив.
Министерството за образование на Словенија, пак, се погрижи и дечињата од социјално ранливите семејства до добијат компјутери и пристап до интернет со цел да можат во услови на епидемија да продолжат со образовниот процес.
Инаку, Словенија досега успешно се справуваше со коронавирусот, па веќе од следната недела властите планираат да ги олабават мерките.
Премиерот Јанез Јанша најави дека веќе од вторник ќе почнат со постепено укинување на ограничувањата воведени со цел да се спречи ширењето на коронавирусот.
Словенечката влада, меѓу другото, подготвува план за постепено активирање на некои производствени, услужни и транспортни капацитети.
„Ја разгледуваме можноста за отворање на оние претпријатија кои можат да обезбедат работа, следејќи ги препораките за ограничувањето на раздалеченоста на луѓето, како и дезинфекција на рацете и носење заштитни маски“,
изјави Јанша.
Премиерот кажа дека има план и за намалување на ограничувањето на движењето на луѓето.
Партиите од опозицијата веќе официјално побараа од владата да почне со враќање на државата во нормална состојба и планско укинувања на ограничувањата донесени за спречување на неконтролираното ширење на коронавирусот.