Од Фондот нагласуваат дека со овие измени не се скратува правото на боледување ниту се ограничува неговото времетраење кога постои медицинска потреба
Управниот одбор на Фондот за здравствено осигурување (ФЗОМ) ги усвои измените на Правилникот за утврдување привремена спреченост за работа. Од Фондот нагласуваат дека со овие измени не се скратува правото на боледување ниту се ограничува неговото времетраење кога постои медицинска потреба.
Од ФЗОМ велат дека матичниот лекар и понатаму може да одобрува боледување до 15 дена, додека за подолг период одлучува лекарската комисија. Од ФЗОМ појаснуваат дека промената од седум на пет дена не значи прекин на боледувањето на петтиот ден, туку претставува контролен период по кој се применуваат соодветни медицински критериуми за конкретната дијагноза.
Со новите решенија, кои се резултат на ревизија на критериумите што датирале уште од 2012 година, се воведуваат повеќе олеснувања за пациентите.
За дел од дијагнозите нема да бидат потребни задолжителни лабораториски испитувања, туку процената ја прави матичниот лекар. По 15. ден, предлогот за боледување матичниот лекар ќе го доставува електронски, наместо досегашната практика.
Исто така, од ФЗОМ велат дека се проширува можноста за утврдување боледување без присуство на пациентот за тешко болни, неподвижни лица и лица на болничко лекување, а кај хроничните болести ќе се користат веќе постојните валидни дијагностички наоди, без нивно непотребно повторување.
Олеснувања има и за тоа што се прецизирани условите за ретроактивно боледување по болничко лекување, за бремени жени и доилки се предвидува олеснување во однос на радиодијагностичките испитувања со јонизирачко зрачење, а кај тешките заболувања се укинува обврската за конзилијарно мислење за боледувања подолги од 60 дена.