Патот е во должина од 25,5 километри и е дел од Коридорот 8. Вкупната инвестиција е 93,7 милиони евра од кои 80,20 милиони евра се средства од Светска банка, а останатите се грант-средства во висина од 13,50 милиони евра
Од Страцин до Крива Паланка ќе се патува 10 минути, а од Крива Паланка до Куманово наместо еден час ќе се стигнува за 40 минути, порача директорот на ЈПДП, Коце Трајановски, на денешната церемонија со која во употреба беше пуштен експресниот пат.
Трајановски кажа дека изградбата почнала во 2018 година, но работите на терен се одвивале со многу забавено темпо. Според него, се интензивирале во последните шест месеци, а со пуштањето на патот задоцниле само три дена.
„Во јули 2024 година кога бев избран за директор на ЈПДП, на првата делница немаше ставено ниту еден сантиметар квадратен асфалт, а денес се фалат дека останале само завршните работи. Но граѓаните ја гледаат работата. Работите беа крајно забавени. Слаба координација, слаби резултати. Кога дојдов за директор на ЈПДП, за мене беше предизвик и затоа одлучив целосно да се посветам на овој проект и поставив цел да се заврши до крајот на 2024 година. Многумина не верува и дури се смееја, но еве го завршивме и го задоцнивме само три дена“,
рече Трајановски.
Патот е во должина од 25,5 километри и е дел од Коридорот 8. Вкупната инвестиција е 93,7 милиони евра од кои 80,20 милиони евра се средства од Светска банка, а останатите се грант-средства во висина од 13,50 милиони евра.
На експресниот пат има изградено три клучки, три моста, 13 вијадукти и 44 косини.
На свеченоста присуствуваше и премиерот Христијан Мицкоски, кој порача дека со иста динамика ќе се работи и на другите делници, а се интензивира и изградбата на другите патишта низ земјава. На СДСМ им порача капиталните проекти да не ги користат за собирање политички поени:
„Имаше и такви кои денес направија политичка промоција и наместо да им се извинат на граѓаните дека не успеале во изминатите шест години да направат нешто, тие денес истрчаа да соберат политички поени. Сакам да порачам дека ова е пат на граѓаните, ова не е пат ниту на СДСМ, ниту на ВМРО-ДПМНЕ, ниту на било која друга политичка опција. Ова е пат кој ќе остане за граѓаните“.
Претходно, поранешниот министер за транспорт и актуелен пратеник на СДСМ, Благој Бочварски, на прес-конференција кажа дека експресниот пат Страцин – Крива Паланка е проект започнат од СДСМ во 2018 година и над 90%, како што рече, бил веќе реализиран до средината на 2024 година.
„Да не беа блокадите на пратениците на ВМРО-ДПМНЕ, овој пат можеше многу порано да се заврши во текот на 2024 година. За жал и само за свои политички цели пратениците од тогаш опозициската ДПМНЕ го кочеа овој проект како опозиција. Тогаш во Комисијата за финансирање и буџет ВМРО-ДПМНЕ со месеци го кочеше предлогот на законот за грант вреден 14 милиони евра, кој беше потребен за завршување на овој експресен пат. Но, како и да е, денес зборуваме за завршен патен правец и граѓаните од утре ќе може да ги почувствуваат придобивките за стратешките проекти започнати во време на владата на СДСМ“,
рече Бочварски.