Во Апелација тече јавна седница за пресудата за масовното прислушување

По повеќе од една година од првостепената пресуда, во Апелацискиот суд во Скопје утрово започна јавната седница за жалбите во предметот „Таргет-Тврдина“

Во судницата е присутен ексдиректорот на УБК, Сашо Мијалков, кој неправосилно е осуден на 12 години затвор, како и ексминистерката за внатрешни работи Гордана Јанкулоска, која беше спроведена од затворот „Идризово“. Таа со пресудата на Кривичниот суд е осудена на четиригодишна затворска казна

По повеќе од една година од првостепената пресуда, во Апелацискиот суд во Скопје утрово започна јавната седница за жалбите во предметот „Таргет-Тврдина“, кој се однесува на масовното прислушување.

Во судницата во Апелација со своите адвокати е присутен ексдиректорот на УБК, Сашо Мијалков, кој неправосилно е осуден на 12 години затвор, како и ексминистерката за внатрешни работи Гордана Јанкулоска, која беше спроведена од затворот „Идризово“. Таа со пресудата на Кривичниот суд е осудена на четиригодишна затворска казна. Присутни се и останатите обвинети, освен Горан Грујовски и Никола Бошковски од УБК, на кои им се суди во отсуство откако избегаа во Грција, а кои со првостепената пресуда добија по 15 години затвор.

Пресуда за „Таргет-Тврдина“: Мијалков – 12 години затвор, Јанкулоска – 4, Грујевски и Бошковски – по 15 години

За жалбите по пресудата ќе одлучува петчлен совет од Апелација, со кој претседава судијата Јани Нича.

„Таргет-Тврдина“ како еден од своите најважни предмети, СЈО го отвори како две одделни истраги. На 29 март 2016 година прво беше отворена истрага „Тврдина“ за уништување на системите за следење на комуникациите во УБК, а на 17 ноември истата година беше отворена и истрагата со кодно име „Таргет“ за масовното прислушување. Поради нивната поврзаност, кога поднесе обвинение, СЈО ги спои двата предмета во еден.
Во обвинението СЈО посочи дека директно и индиректно со прислушувањето биле опфатени околу 20 000 граѓани. Незаконски биле следени 4 286 телефонски броја за кои воопшто не биле издадени судски наредби. На други 1 541 број, пак, комуникацијата била следена и пред и по завршување на траењето на важноста на судските наредби. Или вкупно биле следени 5 827 телефонски броја.

По згаснувањето на СЈО, во септември 2019 година овој како и сите други предмети преминаа во надлежност на редовните обвинителства. По повеќе од три години судење, на 26 февруари лани во Основниот кривичен суд Скопје беше изречена првостепената пресуда, за која денеска во Апелација се одржа јавна седница.