Власта на шверцерски и криминален начин ја силува парламентарна демократија во Македонија наметнувајќи законски решенија кои се спротивни на интересите на македонските граѓани, се вели во реакцијата од ВМРО-ДПМНЕ откако синоќа владата на седница го усвои предлог-законот за ЈО.
„Гласот на пратениците и граѓаните кои ги претставуваат е злоупотребен, правото и правдата се на распродажба, а се повторуваат сите оние немили сцени кога се купуваа, уценуваа и притискаа пратениците“,
се вели во соопштението од опозициската партија, од каде што обвинуваат дека власта преку новото законско решение се обидува по секоја цена да издејствува амнестија за криминалите во изминатите 3 години.
„Новиот закон, кој власта сака да го донесе на сила, ќе ги амнестира функционерите што се богатеа на грбот на граѓаните, преку криминални тендери и грантови. Ќе ги амнестира сите оние зделки во 4 очи, зделки при кои беа злоупотребени парите на граѓаните“, велат од ВМРО-ДПМНЕ и уште еднаш апелираат новото законско решение да го креираат експерти.
Техничкиот министер за внатрешни работи од ВМРО-ДПМНЕ на својот фејсбук-профил напиша дека усвоениот закон е фијаско бидејќи во него не се прифатени забелешките на експертите.
„Доцна вечерва на седница на Владата се изгласа предлог-текст на законот за јавно обвинителство. На насилнички начин, спротивно на Уставот и законите и меѓународните правни стандарди, владејачката партија изгласа закон кој во себе содржи до сега невидени одредби со кои сакаат да го скријат криминалот кој беше направен во последните три години“,
напиша Чулев на Фејсбук.
*Поврзана вест
Владата го достави законот за ЈО во парламентот, ќе се гласа в среда?