Стевчо Јакимовски и Оливер Зафировски до последно водат „мртва трка“ за влез во вториот круг за градоначалник на Карпош со кандидатот на СДСМ, Душко Весковски
Наспроти предноста на Димитриевски пред Илиевски од СДСМ, независната листа за советници во Куманово заостанува со околу 1,4 илјада гласови пред листата на социјалдемократите. Сепак, со над 10 илјади гласа за независната советничка листа, неизбежен е мошне комплициран распоред на силите во новиот општински совет
ГРОМ и ВМРО-ДПМНЕ, како партии кои коалицираат на централно ниво, збирно освоија повеќе гласови од СДСМ во скопската општина Карпош, каде што социјалдемократскиот кандидат за градоначалник Душко Весковски, сепак, влегува како прворангиран во втората изборна рунда.
Сѐ уште е неизвесно дали негов противкандидат на 31 октомври ќе биде Стевчо Јакимовски, претседател на ГРОМ, поранешен (и долгогодишен) градоначалник на Карпош, како и некогашен потпретседател на СДСМ. Всушност, Јакимовски и кандидатот на ВМРО-ДПМНЕ, лекарот Оливер Зафировски, до последно се во „мртва трка“ за второто место по првиот изборен круг. Според последните податоци од ДИК, од близу 84 проценти од обработени резултати, Јакимовски, процентуално, сепак, е во минимална предност пред Зафировски. Разликата меѓу нив и Весковски, пак, е по околу 10 процентни поени.
Од друга страна, кога ќе се соберат гласовите за Зафировски и Јакимовски (збирно над 11 илјади според досега пребројаните гласачки ливчиња), излегува дека опозициското гласачко тело во оваа општина засега е во предност од близу 3,5 илјади гласа пред владејачкиот СДСМ. Поради тоа, останува неизвесноста дали Вескоски ќе успее да ја задржи предноста со која влегува во вториот круг, особено ако се има предвид дека и градоначалничкиот кандидат на Левица освои над три илјади гласа во вчерашниот прв круг.
Во тој контекст е и податокот дека кандидатката за градоначалничка на Скопје, Данела Арсовска, која е поддржана од ВМРО-ДПМНЕ, во Карпош има освоено повеќе гласови од досегашниот градоначалник од СДСМ, Петре Шилегов, според резултатите од над 82 проценти обработени избирачки места. Односно, соодносот меѓу Арсовска и Шилегов во Карпош засега е 8 795 наспроти 7 369
Иако Јакимовски има блага предност во првиот круг пред кандидатот на ВМРО-ДПМНЕ во градоначалничката трка, ситуацијата во поглед на советничките листи е поинаква. Тука ВМРО-ДПМНЕ е второрангирана партија, зад СДСМ, но пред ГРОМ, чија советничка листа, според над 85 проценти обработени гласачки места, има над 2,2 илјади гласа. Резултатот на СДСМ, пак, на советничките листи е сличен со резултатот на Весковски, а предноста пред ВМРО-ДПМНЕ засега е нешто над 700 гласа.
Наспроти неизвесноста во Карпош, извесно е дека ВМРО-ДПМНЕ нема да биде директен учесник во вториот круг од изборите за градоначалник на Куманово, каде што во непосредно соочување влегуваат двајцата довчерашни сопартијци: досегашниот градоначалник Максим Димитриевски, кој во 2017 година победи како кандидат на СДСМ, а овој пат, како независен кандидат, влегува во вториот круг со блага предност, од 53 гласа, пред кандидатот на владејачката партија Оливер Илиевски.
Со оглед на тоа што владејачката ДУИ на овие избори не излезе со свој кандидат за градоначалник на Куманово, така што нејзините гласови, веројатно, отидоа кај двајцата кандидати со социјалдемократски „бекграунд“, одлучувачката улога во вториот круг би им припаднала на опозициските партии. Кандидатот на ВМРО-ДПМНЕ во Куманово, Тони Михајловски, освои над 8,5 илјади гласа во првиот круг, додека Беким Салиу од Алијанса/Алтернатива има над 4,2 илјади гласа. Кандидатката на ЛДП/ДОМ, пак, има над илјада гласа во општината во која до претходните локални избори во 2017 година, без исклучок, победуваа кандидати на СДСМ.
Наспроти предноста на Димитриевски пред Илиевски од СДСМ, независната листа за советници во Куманово, предводена од Ивана Ѓорѓиевска, која застана во поддршка на кандидатурата на досегашниот градоначалник, заостанува со околу 1,4 илјада гласа пред листата на социјалдемократите, кои водат во оваа категорија во најголемата општина во државата. Сепак, со над 10 илјади гласа за независната советничка листа, неизбежен е мошне комплициран распоред на силите во новиот општински совет.
Што се однесува, пак, до ДУИ, нејзината советничка листа за Куманово собра над 5 илјади гласа или речиси двојно повеќе од листата на Алијанса/Алтернатива, чиј, пак, резултат од околу 2,5 илјади гласа е безмалку двојно послаб од резултатот што го освои градоначалничкиот кандидат на оваа коалиција од албанскиот политички блок.
