Од владејачкиот СДСМ, пак, исто така во писмено соопштение, велат дека новата година Христијан Мицкоски ја „започна исто како што ја заврши и тераше и минатата цела година – без став за ниту едно важно државно или стратегиско прашање и без политичка понуда за граѓаните“, поради што, како што додаваат, лидерот на ВМРО-ДПМНЕ во 2024 година (кога треба да се одржат редовните парламентарни и претседателски избори) го очекува седмиот и осмиот последователен пораз
Од најголемата опозициска партија се сè погласни во тврдењата дека пратеници од власта се подготвени да поддржат распуштање на парламентот и одржување предвремени парламентарни избори. Ова првично го најави лидерот на ВМРО-ДПМНЕ, Мицкоски, кој на 30 декември минатата година изјави оти се охрабрени дека има пратеници од коалицијата која е во владата на „ДУИ поддржана од СДСМ“ што веќе праќаат јасни сигнали дека се подготвени да поддржат предвремени парламентарни избори
Опозициската ВМРО-ДПМНЕ утрово преку писмено соопштение го повика премиерот и лидер на СДСМ, Димитар Ковачевски, да не ја држи државата заложништво бидејќи сè повеќе пратеници од неговата партија и од власта се за предвремени избори.
„Расте гласот за предвремени избори во СДС само Ковачевски и Миле Зечевиќ (генерален секретар на СДСМ н.з.) се против, зошто знаат дека ќе изгубат и дека потоа со нивните кариери е завршена работа. Ковачевски и Зечевиќ сакаат некој месец повеќе власт, зошто знаат дека народот никогаш нема да ги избере, тие може само да бидат поставени без избори како сега. Ковачевски бега од избори за да може фирмите на неговиот кум и на неговото потесно семејство да продолжат да се шират низ државата. Ковачевски и Зечевиќ се уплашени од избори и ја држат и СДС и државата заложник, а тие се поставени како калфи на Ахмети и го слушаат Зајас, но и Струмица. Време е Ковачевски и Зечевиќ да се охрабрат. Да, нивните кариери се на мета, но не може цела држава да биде нивен заложник“,
се вели во соопштението од ВМРО-ДПМНЕ.
Од владејачкиот СДСМ, пак, исто така во писмено соопштение, велат дека новата година Христијан Мицкоски ја „започна исто како што ја заврши и тераше и минатата цела година – без став за ниту едно важно државно или стратегиско прашање и без политичка понуда за граѓаните“.
„Само седи на страна, уплашен за својата фотелја во Белиот дворец и лелека за избори, целосно во заложништво на Левица и во сенка на Никола Груевски. Јавните лелекања на Мицкоски, загрижен само за својата фотелја, нема да ги спречат реформите ниту напредокот на земјата“,
стои во соопштението од владејачката партија.
Оттаму додаваат дека продолжуваат со реформскиот курс, со економски политики за раст на платите и пензиите и заштита на стандардот на граѓаните, како и со инвестициите и со чекорите за полноправно членство во Европската Унија.
„Затоа Мицкоски во 2024 година (кога треба да се одржат редовните парламентарни и претседателски избори) го очекува седмиот и осмиот последователен пораз како претседател на ВМРО-ДПМНЕ“,
порачуваат од СДСМ.
Од најголемата опозициска партија се погласни се во тврдењата дека пратеници од власта се подготвени да поддржат распуштање на парламентот и одржување на предвремени парламентарни избори.
Ова првично го најави лидерот на ВМРО-ДПМНЕ, Мицкоски, кој на 30 декември минатата година изјави оти се охрабрени дека има пратеници од коалицијата која е во владата на „ДУИ поддржана од СДСМ“ што веќе праќаат јасни сигнали дека се подготвени да поддржат предвремени парламентарни избори.
Мицкоски како датуми кога би се одржале предвремените избори во повеќе наврати ги посочи 14 и 21 мај.
Во врска со пратениците од владејачката коалиција за кои тврди дека се подготвени да поддржат распуштање на парламентот и распишување на избори, тој рече дека не може да соопшти повеќе детали поради можни притисоци врз овие луѓе.
Како краен период кога работите треба да станат појасни, тој го наведе крајот на јануари и почетокот на февруари следната година.
Лидерот на ВМРО-ДПМНЕ вчера, одговарајќи на новинарско прашање во кои веројатно се алудираше на пишувањата на порталот „Плусинфо“ за наводни превирања во СДСМ и обид за пуч од страна на поранешниот претседател на партијата, Зоран Заев, не сакаше да ги коментира ваквите наводи, додавајќи дека станува збор за „автономна работа на СДСМ“.
Повикувајќи се на свои извори, „Плусинфо“ пишуваше дека Заев со сите сили се обидува да ги поткопа позициите на својот избраник Димитар Ковачевски и за таа мисија бара сојузници на сите страни дури и во врвот на ВМРО-ДПМНЕ. Според пишувањата на порталот, на состанок на „Бихаќска“, Заев претставил план за итни предвремени избори после кои СДСМ и ВМРО-ДПМНЕ заеднички ќе ја делат власта во наредните осум години, како и за елиминација на ДУИ и Али Ахмети од Владата, односно внесување друг партнер од албанскиот политички блок.
Во врска со овие наводи, вчера преку објава на Фејсбук се огласи поранешниот премиер и претседател на СДСМ, Зоран Заев, во која наведе дека станува збор за инсинуации и дека нема политички амбиции.
„Во повеќе наврати изминатиот период кажав дека немам политички амбиции и би сакал уште еднаш да ги демантирам ваквите инсинуации за мое повторно политичко ангажирање. Јас нема да поднесам ниту ќе прифатам кандидатура за претседател на државата. Како претседател на СДСМ ја обединив партијата. А, обединетиот СДСМ заедно со граѓаните урна режим и тоа баш кога тој режим беше најсилен и најразулавен. Јас никогаш нема ниту да помислам да го делам СДСМ, ниту да правам некаков си измислен пуч во СДСМ или било што слично. Доказ за тоа е моето осум и пол годишно раководење со партијата како и државните и изборните победи што ги освојуваше обединетиот и сплотен Социјалдемократски сојуз на Македонија, заедно со силното граѓанско општество“,
напиша Заев, додавајќи дека македонската Влада предводена од СДСМ не престана да испишува историски успеси.