ВМРО-ДПМНЕ: Политиката на свиткан ‘рбет на сијамскиот близнак на Венко донесе штетни договори од кои Македонија едвај крева глава

Освен во писмената реакција на ВМРО-ДПМНЕ за фејсбук-статусот на лидерот на СДСМ, името на Венко Филипче се спомена и на денешната прес-конференција на пратеникот и член на Извршниот комитет на ВМРО-ДПМНЕ, Миле Лефков. Тој побара одговори од Филипче како со плата се купува „ауди кју-8“ и се гради хациенда на Водно

Политиката на свиткан ‘рбет на сијамскиот близнак на Венко, Зоран Заев, донесе затрупани плодови и штетни договори од кои и денес Македонија едвај крева глава – реагираат од ВМРО-ДПМНЕ откако лидерот на СДСМ, Венко Филипче, денеска, на стартот на НАТО-самитот во Вашингтон порача оти земјава станала членка на Алијансата благодарение на посветеноста и одлучноста на СДСМ.

• Филипче: Патот до НАТО не беше лесен, но сега граѓаните може да се чувствуваат безбедно оти сме дел од најмоќниот воен сојуз во светот

ВМРО-ДПМНЕ го повика Филипче да каже дали се чувствува виновен поради, како што оценија од партијата, последиците од катастрофалните договори Македонија ги чувствува и денес.

„Братот по криминал на Филипче, Заев, додека со едната рака се колнеше во идентитетот, со другата потпишуваше договори и немаше мака. Членството во НАТО не е придобивка на Венко, но придобивка од Венко се десетици илјади луѓе кои ги загубија животите поради неспособниот Венко. Венко Филипче наместо да се занимава со висока политика треба да одговори дали уште смета дека кабелот е виновен за запалената модуларна болница?“,

велат од ВМРО-ДПМНЕ.

Освен во писмената реакција на ВМРО-ДПМНЕ за фејсбук-статусот на лидерот на СДСМ, името на Венко Филипче се спомена и на денешната прес-конференција на пратеникот и член на Извршниот комитет на ВМРО-ДПМНЕ, Миле Лефков. Тој побара одговори од Филипче како со плата се купува „ауди кју-8“ и се гради хациенда на Водно.

„Чие е ‘аудито’ со кое Венко Филипче се вози и дали е на негово име или на некој друг, ако е на друго име, кој е тој што на Филипче му дал да вози кола од 250 000 евра и со кој мотив? Дали луксузното ‘ауди кју-8’ кое го вози Филипче е награда за некој од десетиците милионски тендери и дали народот страдаше седум години за сега Филипче да се вози во скапи џипови? Филипче да каже и како неговото семејство се стекна со хациенда на Водно и колку пари е платена? Филипче да каже дали добитниците на тендери во здравството морале да влегуваат во дилови со него или нему блиски?“,

рече Лефков на денешната прес-конференција.

Од партијата ги повикаа Антикорупциската комисија и Јавното обвинителство да отворат истраги за имотот на Филипче и за имотот што тој не го користи, но за кој постои сомнение дека е скриен.