ВМРО-ДПМНЕ не верува во заканите кон експратеничката од оваа партија Весна Дамчевска-Илиевска и вели дека целиот случај е монтажа и конструкција.
„Би бил многу краток и јасен. Монтажа и конструкција којашто е дел од ново промовираната коалиција помеѓу иницијаторите и Зоран Заев и не би имал што да коментирам повеќе. Повторно потенцирам монтажа и конструкција. Институциите да истражат, доколку не би биле под капата на Зоран Заев, да истражат што точно се случило. Но, еве јас од оваа говорница ви кажувам монтажа и конструкција“,
вели портпаролот на ВМРО-ДПМНЕ, Димче Арсовски.
Дамчевска која е дел од Иницијативниот одбор кој бара повлекување на Христијан Мицкоски и свикување на вонреден конгрес, во јавноста излезе со изјави дека добива закани откако се појавила и зборувала на прес-конференцијата на иницијаторите. Дел од медиумите објавија и дека полицијата вчера попладне привела еден 29-годишник, кого експратеничката претходно го пријавила дека ѝ упатил вербални и пишани закани и навреди. Станува збор за лице кое отслужувало затворски казни и е сторител на повеќе кривични дела.
Претходно денеска, како што пренесе А1он, за заканите се огласија и од Иницијативниот одбор велејќи дека тоа што пратеничките на ВМРО-ДПМНЕ молчат за нивната поранешна колешка е доказ дека инцидентот не бил случаен. Од одборот посочија дека праќањето поранешни затвореници, криминалци и насилници пред домот на една жена не е и не може да биде замена за демократска дебата.