Предлогот на опозицијата за измени на Законот за Владата, сепак, не се најде на дневниот ред на денешната собраниска седница
ВМРО-ДПМНЕ не успеа во намерата уште денеска во Собранието да почне расправа за укинување на т.н. пржинска влада, односно за измените во Законот за Владата што ги предложи пратеничката група на оваа партија.
Иако координаторот на ПГ, Никола Мицевски, побара дневниот ред на седницата што почнува денеска да се дополни со предлог-измените што ги предлага ВМРО-ДПМНЕ, тие не се најдоа во агендата што ја изгласаа пратениците.
„Врз основа на член 71, став 1 од Уставот и членовите 132, 137 и 170, барам оваа точка да биде додадена ред. Со предлогот за изменување на Законот за Владата се тргаат одредбите кои се однесуваат на начинот на функционирање на Владата, или т.н. пржинска влада. Го поднесуваме овој предлог-закон од една и единствена причина – да се скратат, односно да се вратат роковите за организација на избори, рокот да биде како што беше“,
рече Мицевски и додаде дека се работи за мали измени, односно за бришење на одредени одредби од Законот.
Според него, пржинската влада е нефункционална и затоа за нејзино укинување разговарал и лидерот на ВМРО-ДПМНЕ, Христијан Мицковски, со доскорешниот лидер на СДСМ и премиер, Зоран Заев, на лидерска средба.
Откако опозицијата ја официјализира иницијативата, доставувајќи ја во Собранието како предлог-измени во Законот за Владата, во политичката арена се наѕира начелен консензус преодната влада да стане „историја“, ама доминира ставот дека нема потреба од брзање.
За владејачките партии е спорен мотивот поради кој опозицијата иницира укинување на т.н. пржинска влада (која се избира 100 дена пред парламентарни избори). Иако генерално се согласни дека во перспектива треба да се размислува за таа опција, владејачкиот табор инсистира на тоа дека нема да има вонредни, туку редовни избори за пратеници во 2024 година.
Во пржинската влада, опозицијата номинира свои кадри за министри за внатрешни работи и за труд и социјална политика, како и дополнителни заменик-министри за земјоделство, за финансии, како и за информатичко општество и администрација. Владејачката партија поставува дополнителни заменик-министри во внатрешни работи и во труд и социјална политика, каде што опозицијата има министри.